KHAWTHLIR

Thisen pe
Mizoram University-a NSS unit chuan nimin khan an campus-ah thisen pek rûnpui huaihawtin, Civil Hospital Aizawl tan thisen unit 161 an pe a, petute mipa 130 leh hmeichhia 31 an ni.

CYMA leh FLAM
Central YMA hruaitute leh Former Legislators Association of Mizoram (FLAM) hruaitute chu nimin chawhnu khan CYMA Office-ah an inkâwm. Kum 2023-a Mizoram inthlanpui awm tur thlir lâwkna hun hmangin, Mizoram People Forum-a la tel lo kohhran leh tlawmngai pawl dangte chu an tel ve ngei theih nan hmalak ṭha an ti. FLAM hruaitute chuan, senso hautak lo zawnga inthlanna kalpui a nih theih nan hma la turin CYMA hruaitute an ngen bawk.

Bank inzirtir
Ministry of Finance leh Ministry of Corporate Affairs kaltlanga Iconic Week hman mekah nimin khan Champhai Kahrawt YMA Hall-ah AKAM Iconic Week pualin Lead Bank Office leh NABARD chuan bank kaihhnawih inzirtirna an buatsaih a, district bawrhsap James Lalrinchhana'n a hmanpui.

Certificate hlân
Pachhunga University College hnuaia 'Certificate Course in Mizo Cultural Studies and Performing Arts' zir chhuak mi 17 hnenah nimin khan PUC principal Prof. H Lalthanzara'n certificate a hlân. Course hi kum 2017 khan ṭan a ni a, tun ṭum hi a thawh lina a ni.

Heroin man
Champhai Khankawn checkgate duty police-te chuan June 7, Thawhlehni zan khan heroin gram 312 (cheng nuai 156 hû) leh a neitua puh Lalawmpuia (22) s/o Kapkima (L), Kelkang an man. Zokhawthar police-te pawhin Thawhlehni zan vêk khan Zokhawthar dáiah Zosangpuii (35) w/o Neihlianthanga, Ruantlang hnen aṭangin heroin gram 61 (cheng nuai 30.5 hu) an man bawk.