AMC-a thawkte tan Health Awareness cum Screening

Aizawl Municipal Corporation (AMC) hnuaia hriselna lama thawktute pualin, nimin khan AMC conference hall-ah Health Awareness cum Screening buatsaih a ni a, National Health Mission (NHM) mission director Dr Eric Zomawia'n a hmanpui.

Dr Eric Zomawia chuan, tunlaiah nunphung dik loh vanga mahni insiam chawp natna - non-communicable disease (NCD)-in nasa takin mi a tihbuai thu sawiin, "Ni tin hun hman dan kan fimkhur a ngai. Ei leh in, zûk leh hmuamahte fihlîm a, taksa sâwizawi ngaih pawimawh a ṭul," a ti a; thawktute chu an hriselna ngai pawimawh tur leh hriselna tichhe thei laka fihlim turin a chah.

Awareness cum Screening hi NHM hnuaia Urban Health Mission leh MSACS-te buatsaih a ni a; thil chi hrang 10 chuangah thawktu 80 chuangte hriselna dinhmun Health department staff mi 17-in an endik. Vawiinah chhunzawm tur a ni a, naktukah bawlhhlawh paihna lirthei khalhtute leh bawlhhlawh hâitute endik leh a ni ang.