District 5-ah Covid-19 vei an awm lo

June 7, Thawhlehni khan Mizoramah Covid-19 vei mi 15 hmuh chhuah a ni. Nimin khan hripui vei dam tawh mi 16 chhuahtir an ni a, Covid-19 positive thi an awm lo. Nimin tlai khan district pangaah positive an awm tawh rih lo.

Thawhlehnia Covid-19 positive hmuh chhuahte chu mipa pasarih leh hmeichhia pariat an ni a; ZMC RT-PCR laboratory-a hmuh pahnih leh Rapid Antigen Test hmanga hmuh 13 niin, positivity rate 5.54% a ni.

IDSP record angin, Mizoramah Covid-19 vei 2,28,449 hmuh chhuah a ni tawh a, mipa 1,06,358 leh hmeichhia 1,22,091 an ni a, mipa aiin hmeichhia 15,733-in an tam zawk. Nimin tlai dar 5 thleng khan mi 2,27,656 (99.65%) chhuahtir an ni tawh a, mi 700 (0.31%) thi tawhin, enkawl mek mi 93 (0.04%) an awm.

Nimin tlai dinhmun angin, Mizorama district 11 zinga district pangaah Covid-19 positive an awm tawh rih lo a, chu'ngte chu Siaha, Champhai, Kolasib, Lawngtlai leh Hnahthial district-te a ni. Positive enkawl lai mi 10 leh a aia tam awmna district panga a awm a, positive tamna ber Aizawl leh Mamit district-ah mi 23 ve ve an awm a ni.