MLPC Act tihtawp rawtna resolution Assembly House-ah hnâwl a ni

Nimina Assembly sessionah MNF member Lalrinawma resolution put luh, MLPC Act tihtawp rawtna sawiho a ni a, hnâwl a ni. Chief minister Lal Thanhawla chuan, zu buaipui reng chu zahthlak a tih thu a sawi.

Lalrinawma private resolution hi, 'MLPC Act kan hman mek hian kohhran, khawtlang, chhungkua leh mimalah harsatna leh buaina nasa tak min thlen avangin he dan hi titawpin, MLTP Act kan hman ṭhin ang kha hman leh ni rawh se' tih a ni.

Lalrinawma chuan, MLPC Act hi mipuiin an tawrh nasat avangin tihtawp ngei ṭha a tih thu leh miretheite'n an tawrh nasat thu a sawi a, "MLPC Act titawp tur hian hun kan nghak rei lutuk ang tih a hlauhawm," a ti.

Chief Minister chuan, khawvel hnam mâwl ber pawhin zu an buaipui tawh lo nia sawiin, "Hetiang a nih lai hian Kristian ram intiin kan buaipui hi a zahthlak a, buaipui loh ni se kan duh. Kristian, hlauh nei tlem ber tur hian hlauh kan ngah hle," a ti a; zu khap tawh ramte'n an sim zel niin a sawi.

Khawvel a awm chhung chuan zu leh sualna a awm reng dawn tih sawiin Lal Thanhawla chuan, "Zu hi suala ngai tan chuan fihlîm tum mai tur. Sualnate lakah hian pil loh kan tum a ngai. Ṭhenawm state-ah a awm chhung chuan hetah khap mah ila kan mualpho hla ting a ni mai. Kan mualpho deuh a nih pawhin kan ram chhungah mualpho mai ila," a ti.

Excise & Narcotics minister R Lalzirliana chuan, "Zu chungchangah a ṭha ber ngaihtuah a har, inbeihna a awm zel. Ṭha kan tih vanga MLPC Act hi pu lut pawh kan ni lo," a ti a; zu khapna dan MLTP Act zir chiangtute chuan a hlawhtlin loh vanga alternative plan siam tura rawtna an thlen thu a sawi.

MLPC Act chu a zir chiang tura dinte'n uluk taka an zir chian dawn thu sawiin R Lalzirliana chuan, "Study team-te zirchianna hi sokar chuan uluk takin a zir chiang leh ang. Heng zirchiannate hi nghak phawt ila a ṭha," a ti.

Opposition group leader Vanlalzawma chuan, MLPC Act sawiho a nih lai aṭangin eptute chuan a tih chi loh an ti ṭâng ṭâng tih sawiin, "Kan hman aṭangin zu zawrh hi kan zo lo tih a lang chiang hle," a ti a; zu zuar ṭhinte sumdawnna mi hausa hoin an chhuhsak avangin drugs zuarah an inlet nia sawite a awm thu a sawi.

Mizorama zu zawrh zinga a ṭha lo a awm anga sawi a awm tih sawiin Vanlalzawma chuan, "He ti zat mamawh belh thut a ni si a, factory tihlenna hun a awm si lo. Zu ṭha vak lo an lo thawn em tih ngaihtuahnaah a awm. Zu zuartute'n 'A tira phûr taka zu lei ṭhin reh ta daihte an chhui chian chuan an lo thi tawh zel' tih an sawite ka hria a ni," a ti.

Lalrinawma resolution chungchangah hian member 19-in an ngaihdan an sawi a, pawm loh duh an tam zawk avangin hnâwl a ni ta a ni.