MNF-te'n zu zawrh tihtawp duhna an lantir

MNF party mi eng emaw zat chu an ṭhalai pawl huaihawtin nimin khan Assembly House bulah minute 30 chhung vel an pungkhawm a, Mizorama zu zawrh tihtawp an duh thu leh Assembly session-a MNF MLA, Lalrinawma resolution pass an duh tih an lantir.

MNF ṭhalai president K Vanlalvena chuan, an punkhawm chhan chu, Assembly session neih mekah an MLA Lalrinawma private member resolution, "MLPC Act kan hman mek hian kohhran, khawtlang, chhungkua leh mimalah harsatna leh buaina nasa tak min thlen avangin he dan hi titawpin, MLTP Act kan hman ṭhin ang kha hman leh ni rawh se,' tih chu pass ngei se an duhzia lantirna a nih thu leh, zu zawrhin a ṭha lo zawnga Mizo mipui a nghawng avangin tihtawp an duh tih lantir a nih thu a sawi.

K Vanlalvena chuan, India rama Court sang ber, Supreme Court-in order thar a chhuahah, zu dawr reng reng national highway leh state highway aṭanga metre 500 aia hnaiah a awm tur a ni lo tih a nih thu sawiin, "Tuna Aizawla zu zawrhna zawng zawng hi metre 500 aia hnaia awm deuh vek an ni. Mizoram sorkar leh zu zuartute hian Supreme Court order an bawhchhe mek a ni," a ti.

MNF-te pungkhawm hian, 'Mihring nunna aia zu chhiah îttu sorkar hi kan duh lo' tih te, 'Zu zawrh hi tihtawp ni rawh se' tih te, 'Mipui nun tichhetu Congress sorkar zu zawrh hi kan duh lo' tihtein an au rual a; buaina leh harsatna awm loin darkar chanve vel hnuah an ṭîn darh a ni.