Central Jail-ah sorkarin tih tur a ti tâwk lo - Rekha Sharma, NCW member

National Commission for Women member, Mizoram leh Arunachal Pradesh viltu Rekha Sharma chuan, Central Jail-a hmeichhe tànna bikah sorkarin tih tur ṭhenkhat a tih loh thu a sawi a; Mizoramah naupang khuaikhem leh hmeichhe pawngsual thubuai (POCSO case) a pun tial tial thu a sawi bawk.

Rekha Sharma hian March 21, 2017-ah Ai­zawl a rawn thleng a, Central Jail-a hmeichhe tànna pindan te, police station-a Crime Against Women Cell te, Social Welfare department enkawl Protective Home te, Mizoram University-a Women Study Centre-te a tlawh a; hmeichhe tlawmngai pawl hruaitu te, Chief Secretary leh DGP-te a kawm bawk. Vawiinah Aizawl a chhuahsan ang.

Rekha Sharma hian nimin khan Aizawl Press Club-ah thuthar theh­darhtute a kâwm a; jail chu mihring insiamṭhatna hmun, reform centre ang a nih thu sawiin, Mizoram sorkarin a tih tur tih lo a nei nual a, kum hnih kal taa National Commission for Women member pakhatin a tlawh lai leh tun dinhmun a la danglam vak lo tih a sawi.

Central Jail-ah hian study centre a awm mumal lo a, sorkarin dam­dawi a pe tur a nih laiin a pe ṭha lo a, tángte'n an inngaihtuah chawp a ngaih thute Rekha Sharma chuan a sawi.

Hemi chungchanga zawhna chhangin, "Puanṭhui ringawt zirtir ṭhin hi a tâwk lo. Duh thlan tur nei ve se, computer leh thil dangte pawh," a ti.

Rekha Sharma sawi danin, jail-ah hian hmeichhiate'n eirawng­bawlna hmun an nei tur a ni a, eirawng an inbàwl thei tur a nih laiin, chu'ngte chu a awm lo.

Heng thilte hi DGP Thianghlima Pachuau a kawmnaah DGP chuan a hre lo niin a sawi. Central Jail dinhmun chu Chief Secretary a kawmnaah a hrilh bawk.

Aizawl Police Sta­tion-a Crime Against Women Centre a tlawh chungchang sawiin Rekha Sharma chuan, "Kum 2008 aṭangin police atana hmeichhia bik lakna neih a ni lo, hmeichhe police an indaih lo hle a, Centre-a hmeichhe police-te pawh district dangahte hmeichhe case khawih tura an zin a ngai a ni," a ti a; Chief Secretary leh DGP hnenah hmeichhe police tam zawk la tura a ngen thu a sawi.

Rekha Sharma chuan, Crime Against Women Cell-ah thil ṭha tam tak a awm thu a sawi rualin, "Mizoramah domestic violence a la tam hle tih record aṭangin a hriat theih," a ti. Women Cell record a sawi chhawn danin, Protection of Children from Sexual Offences (POCSO) Act hnuaia thubuai ziah luh a pung tial tial a; kum 2015-ah case 71 leh kum 2016-ah case 103 a ni a, kumin bikah tun thlengin case 19 ziah luh a ni tawh.