Mizoramah World TB Day hman a ni

Nimin kha World TB Day a ni a, Mizoramah pawh Aizawl leh district dang ṭhenkhatah hman a ni. Aizawlah chuan Chanmari YMA Hall-ah Health minister Lal Thanzara hoa hman a ni a, kumina World TB Day thupui chu 'TB titawp turin i ṭangrual ang u' tih a ni.

Aizawla World TB Day hmannaah Health Minister chuan, ngawr (Tuberculosis) natna laka Mizoram mipui an himna tur leh a veite enkawl dam an nih theih nan sorkarin chak zawka hma a lak zel thu sawiin, "Tunah chuan Revised National TB Control Programme (RNTCP) chu State AIDS Control Society, National Tobacco Control Programme leh Non Communicable Disease-te nen an thawkho mek a ni," a ti.

Lal Thanzara chuan, HIV hrik paite thihpui tam ber chu TB a ni tih sawiin, "Sorkar pawhin hmalakna thar pawimawh tak a tichhuak a. TB leh HIV vei kawpte chu ART Centre aṭangin HIV damdawi bakah TB damdawi pek chhuah tel ṭhin a ni," a ti a; Health Care Provider Surveillance nei tura ruahman a ni a, damdawi-in leh Health sub-centre-a thawkte pawh TB an vei leh vei loh hunbi neia enfiah ṭhin an nih tur thu a sawi.

RNTCP kaltlangin TB hmuh chhuahna khawl thar CBNAAT-TB bakah, drug resistant TB (Rifampicin Resistant) hmuh chhuahna khawl - Aizawl, Champhai, Kolasib, Lawngtlai, Lunglei, Mamit leh Siaha-ahte bun a nih thu leh TB veite chu RNTCP hnuaiah a thlawna damdawi pek theih reng an nih thu a sawi a; TB natna tibo turin sorkar hmalakna chauh a tawk lo a, sorkar, private sector, tlawmngai pawl leh mimal tinte ṭanrual a ngaih thu a sawi bawk.

World TB Day prog­ramme hi Health Services director Dr F Lallian­hlira'n a kaihruai a, Health Minister-in Health Care Provider Surveillance a hawng.

Health secretary Lalrinliana Fanai-in Zuangtui, Chhinga Veng leh Rangvamual sub-centre hnenah TB enkawlnaa hma la ṭha lawmpuina a hlan.

Report-a an tarlan danin, India ramah kum 2016-ah khan mi nuai khat zela mi 217-in TB an vei anga chhût a ni. Kum 2016 chhung khan Mizoramah TB vei mi 2,149 an awm a, chu'ng zinga 11.70% chu HIV vei an ni. Mizoramah microscope hmanga TB natna hrik en theihna hmun 35 a awm.