KHAWTHLIR

Earth Hour
India ram leh khawvel ram dang 177-ah vawiin hian a rualin Earth Hour hman a ni dawn. Earth Hour hi zanin dar 8:30 - 9:30 inkarah hman a ni dawn a, he darkar khat chhung hi Power & Electricity department chuan Mizoram pumah kawlphetha pek an titawp dawn. Earth Hour hi sik leh sa danglam zel venna leh renewable energy pawimawhzia mipuite hriattirna atana tih a ni.

Sipai tur thlah
Tun hnaia Mizoram aṭanga sipaia ṭang tur lak thar mi 149-te chu nimin khan Zemabawka Army Recruiting Centre-ah thlah an ni. Sipaia ṭang turte hi Army Recruiting director Col. Manish Natu-a'n a fuih. Mi 149-te hi general duty, tradesman, clerk leh nursing assistant atana lak an ni.

Hyderabad-ah zir
New Economic Development Programme (NEDP) hnuaia Entrepreneurship Development Scheme (EDS) kalpui mekah, college leh university-a zirtirtu 10 thlan chhuahte chuan March 20-24, 2017 chhung khan National Institute of Micro, Small and Medium Scale Enterprises, Hyderabad-ah 'Training of Trainers on Entrepreneurship' an nei. College leh university-a zirtirtu 10-te hi master trainer atana buatsaih niin, district hrang hranga sikul leh college-ahte entrepreneurship chungchang an zirtir chhawng leh dawn a ni.

Tuizem siamsak
225 battalion CRPF-te chuan, Civic Action Programme hnuaiah Rangvamualah cement concrete tuizem an siam a, March 23, 2017 khan Rangvamual Local Council hnenah an hlan.

HSS 163 a awm
School Education minister H Rohluna chuan MNF member Dr K Beichhua zawhna ziaka chhangin, Mizoramah sorkar ta leh sorkar ta ni lo higher scondary school (HSS) 163 a awm mek thu a tarlang a, "HSS hi hawn belh tumna a awm rih lo," a ti.