Hnathawh danah World Bank lawm lo
PWD changtu chief minister Lal Thanhawla chuan, World Bank sum hmanga Mizorama hna thawhte chu a ṭhat tâwk loh avangin World Bank hotute an lawm vak lo niin House a hrilh.
MNF member Lalruatkima'n hnathawh ṭhat tâwk loh vanga World Bank lam an lungawi loa a hriat thu a sawi chungchangah Chief Minister chuan, "Champhai leh Zokhawthar inkar kawngpui siam mek chu contractor-in hna a thawh ṭhat loh avangin a sum tumtu World Bank an lawm vak lo. World Bank hotute hi rawn kalin sorkar thlengin min nawr a ni," a ti a; sorkar chuan contractor-te nawr bak tih theih vak a nei lo niin a sawi.
Lal Thanhawla chuan, National Highway siam tur reng rengah contract amount a san avangin Mizoram dinhmun pawh hre lo, phai lama contractor lian zawkte'n hniam tê têin an chháng ṭhin tih sawiin, "A taka hna an tawh dawnin harsatna an tâwk leh ṭhin si a, hei hian nasa takin hnathawh a tihmuan phah ṭhin," a ti.
Chief Minister sawi danin, Champhai-Zokhawthar kawngpui hi World Bank - International Development Association (IDA) aṭanga loan cheng vbc. 153.10 pûk hmangin December 26, 2014-ah siam ṭan a ni a, a thawk tur hian Navi Mumbai-a TARMAT Limited thlan a ni. Hna hi June 26, 2018-a zawh tura ruahman a ni a, tunah hian 42% thawh zawh a ni tawh.