Oil zawngtu company-te'n sorkarah Official-in engmah thlen an la nei lo

Geology & Mineral Resources (GMR) minister H Rohluna chuan, Mizorama oil leh gas zawngtu company-te'n official-in sorkarah engmah an la thlen loh thu House a hrilh.

Opposition group leader Vanlalzawma zawhna chhangin H Rohluna chuan, company-te'n an hnathawh dan official-in report ngai lo mah se, an hnathawh chin uluk taka an vil zui reng avangin, an thlen chin an hriat chian thu a sawi.

GMR Minister sawi danin, ONGC-te'n American technology hmanga thlawhtheihnaa survey an neih hnuin Suarhliap, Mamit district-ah lei verh leh an tum mek a, khawtlang mipuite nena inràwnkhawmnate pawh an buatsaih a ni tawh.

H Rohluna hian Mizorama oil leh gas zawngtute'n Meidumah gas an hmuh tawh thu leh hmun dangah chuan an beisei ang an la hmuh loh thu House a lo hrilh tawh a ni.