Mamit DC leh Karimganj DC inkâwm
Mamit DC Lalbiaksangi leh Assam-a Karimganj DC Pradip Kumar Talukdar-te chuan March 23, 2017 khan Karimganj DC conference hall-ah Mizoram leh Assam inkara thawhhona ṭha zawk a awm theih dan tur leh ram venhimna kalpuinaa thawhhona dan tur an sawi dun.
Meeting-ah hian ram pahnihte inkara thawhhona ṭha zawk a awm theih dan tur hrang hrang sawiho a ni a; thing leh mau tawlhrûk veng turin Forest department-a DFO leh RO-te ṭangkawpin patrolling neih ṭhin ni se, Mizoram leh Assam ramte chu rûkrû, suamhmang leh hel laka a him theih nan security force-te'n joint patrolling nei ṭhin se, tihte sawiho a ni.
State pahnih inkarah boruak rálmuang zawk a awm theih nan Medili lui bula security post chu tihchangtlun ni se, an ti a; dan leh thupek kenkawh leh ram venhimna chungchangah thawhhona ṭha zawk a awm theih nan a zing thei ang bera inbiakna neih ṭhin ni se, an ti bawk.
Mamit DC chuan, Mizoram PWD-in North Eastern Council hnuaia KDZKT Road laih hna kal mekah Assam ram paltlanga contractor-te’n bungrua an phurh luhna kawnga harsatna an tawh ṭhin chungchang a sawi lang a; Karimganj DC chuan, lo en zui a, harsatna awmte chingfel tura hma a lak tur thu a sawi.