Serchhipah Chapchar Kût hmang

Serchhip khua chuan nimin khan Leisekawt khelmualah Chapchar Kût an hmang a, YMA Serchhip sub-headquarters president R Sanghming­thanga kût thlengtu niin, Serchhip DC Dr Lalrozama kût pa a ni.

Bawrhsap Dr Lalrozama chuan, Serchhip mipuiin kum dang zawng aia kumin Chapchar Kût an hlut chu hmuhnawm a tih thu a sawi a, Pathian hre reng chunga Mizo hnam ziaráng leh nihphungte chawi nun zel a pawimawh tih sawiin, "Puitlingte'n naupang zawkte hnenah zirtir a, kan tu leh fate'n ngaihhlut nacháng an hriat zel a ṭul," a ti. Chapchar Kût thupui 'Aia upa zah' tih a nih angin, aia upa zawkte chunga nungchang mawi leh ṭha zawk neih thar theihna bul ni se a duh thu a sawi.

Chapchar Kûtah hian Ser­chhipa YMA branch hrang hrang bakah, MHIP leh MUP-te'n hnam lâm leh hnam zia pholang thei chi hrang hrang an entir a, zaithiam eng emaw zat an zai a; tlaiah chhâwnghnawh hun hman a ni.

Serchhip hian kumin­ah Presbyterian Kohhran Hmeichhe Inkhawmpui Lian an thlen avangin Chapchar Kut hun pangngai, March 3-ah an hmang ve thei lo a, thuneitute remtihna angin nimin khan an hmang a ni.