MJA-te'n Sports Stadium an enfiah

Champhai district MJA member-te chuan nimin khan Champhai Zotlanga Sports Stadium thar sak mek an tlawh a, hna thawh zawh tawhte leh thawh mekte an enfiah.

Zotlang Sports Stadium siamna atan hian Rs. 20,32,96,251 ruahman a ni a, Balajee Developer Ltd.-in a siam hna an thawk. March 15, 2014-ah hna bul ṭan niin, October 14, 2015-a zawh tura tih a ni a; mahse, chhan hrang hrang vangin hun tiamah an zo hman lo.

Tun dinhmunah Sports Stadium siamnaah hian intlansiakna tur track-a rîn (line) siam ngai tih lo chu zawh a ni tawh a; stadium enkawl hna thawk tur tihfel a la ni lo a, chuvang chuan tui leh electric thlunzawm theih a la ni lo; internal wiring zawh a ni tawh thung.

Stadium-ah hian football khelmual metre 100X60-a zauah phûl lem phah a ni a, boxing hall pakhat, intlansiakna lane riat, mi 3,500 lenna gallery block panga, car 60 leh two wheeler 250 dahna parking-te a awm dawn a ni.