Minister Zira'n damdawi-inah ṭanpuina pe

Minister R Lalzir­liana chuan a bial, Sai­tual damdawi-ina hman tur 10KV generator a pe a, nimin khan a hlàn. Minister hian damdawi-in tan Rs. 50,000 a pêk bakah, police-te hnenah a ṭula an hman atan Rs. 50,000 a pe bawk.

Saitual damdawi-in kawta generator hlanna inkhawmah R Lalzir­liana chuan, kum upa lam tan chhuah tam loh a ṭha tih sorkarin thu­chhuah a siam chu ngai pawimawhin, a bial chu Covid-19 boruak­ah a tlawh zin theih loh thu sawiin, thuphá a chawi a; hripui donaa ṭha­hnemngai taka thawktute chu chawi­mawi an phû tih sawiin, ram hruaitute finchhuah zel turin mipui a sáwm.

Mizoram Teachers Federation-in ambulance an pek zinga pakhat chu Saitual damdawi-ina hman tur a ni a; ambulance khalh­tu kum khat chhung hlawh atan R Lalzir­liana chuan MLA fund aṭangin sum eng emaw zat a pe nghal a ni.

Saitual damdawi-inah hian doctor pasa­rih - MBBS pali, BDS pakhat leh AYUSH doctor pahnih bakah, thawktu dang­te an awm mek a; Co­vid-19 léng kaihhnawihah thawktute pui tura inpe (volunteer) - nurse, laboratory technician, driver, etc. mi 40 vel an awm mek bawk.

Power & Electricity minister R Lalzirliana hian nimin vek khan Thingsulthliah Primary Health Centre (damdawi-in) tan 10KV generator a pe bawk a; medical officer Dr Mary Lalnunpuii Ralte hnenah Thingsul­thliah PHC-a hman tur Rs. 50,000 leh hand sanitiser a hlàn nghal bawk a ni.