Lungverh-in NDRF chhuak turin an duh Covid-19 veite vangin harsatna an tâwk
Lungverh Branch YMA chuan, National Disaster Response Force (NDRF) mi leh sa Lungverha awm mekte chu sawn chhuah an duh. NDRF-te zingah Covid-19 vei an awm avangin harsatna an tâwk niin an sawi.
Vanglaini palai zawhna chhangin Lungverh Branch YMA hruaitute chuan, "NDRF mi leh sa Covid-19 veite chu enkawl tura lâk chhuah vek an ni tawh a, tunah hian positive ve lo mi panga an la awm. Containment area-a puan kan nih avangin Aizawl DC hnenah mi panga la awmte sawn chhuak tura kan ngenna thu ziak chu PDF hmangin kan thehlut a, meeting-te an neiin kan hria," an ti.
Lungverh Branch YMA hruaitute chuan, tun dinhmunah chuan NDRF-te chu an bungruate nena sawn chhuah vek a rem rih lo mai thei tih sawiin, "YMA ang chuan sawn chhuah ni se kan duh reng tawh. Tun tut tuta sawn chhuah theih a nih lo pawhin, sorkarin hma la se kan duh," an ti a, NDRF-te sawn chhuah an nih theih nan hma an lak zel tur thu an sawi.
State páwn aṭanga rawn lêt NDRF mi leh sate Lungverhah dah an ni tih hriattir an nih loh thu sawiin Lungverh YMA hruaitute chuan, "Covid-19 an vei tih an puan khan kan hre ve chiah. An rawn haw hun lai vel khan inkhàrkhip inthlahdul chhoh lai a ni bawk si nen, fimkhur nachang kan hre lo. Report chu dawng ila kan fimkhur phah ngei ang. 5th IR lam pawhin NDRF-te rawn lêt thu hi an dawng lo," an ti.
State hrang hranga NRDF mi 20-te chuan June 27, 2020 khan Lungverh an thleng a, an swab sample endik a nih hnuah mi 10-in Covid-19 an vei tih hmuh a ni. Hei vang hian phai aṭanga rawn lêt hlim ni lo, NDRF mi leh sate pawh swab sample endik leh a ni a, mi panga chuan Covid-19 an kai tih hmuh chhuah leh a ni.
NDRF mite'n Lungverha dawr pakhatah thil an lei ve ṭhin thu sawiin YMA hruaitute chuan, "An awmna hmun hi field panna kawng a nih avangin an inkhel tur kal lam leh haw lamah an kal pèl ṭhin a, ball lo pump-te pawh an awm. An chaw náwi la ṭhinte pawh an awm," an ti a; NDRF mite chu police canteen-ah pawh an chawlh ṭhin thu an sawi.
Lungverha NDRF mite'n Covid-19 an vei avang hian Lungverh mi leh sa leh 5th IR police mi 90-te swab sample endik niin, result a chhuak tawh a, Covid-19 vei hmuh a la ni lo. Tunah hian sample lak tawh, result la chhuak lo mi 110 vel an awm bawk. NRDF mite zingah hripui vei an awm avangin Aizawl DC chuan Lungverh chu containment area-ah a puang tawh a, luh leh chhuah phal a ni lo.Thu dawn danin, Lungverhah chhungkaw 120 vel an awm a, dawr pahnih awmin, NDRF mite leh tualchhung mite'n an indawr ṭâwm avangin khâr rih a ni. YMA hruaitute chuan, veng pakhatah mipui ni tin mamawh zual lam khawmin, hun bi neiin an zuar ṭhin.
Hetih lai hian, Lungverh mi leh sate pawisa dawng duh an awm loh avangin veng pakhata an thil lâknaah pawh hian a báin an la a, electric bill pawh an pe thei lo. Sorkar aṭangin ṭanpuina an la dawng lo a, bialtu MLA Zothantluanga leh AMC councillor Rosiamngheta Hauhnar hnen aṭangin ṭanpuina an dawng tawh thung.
Lungverh dinhmun
• Chhungkaw 120 vel an chêng
• Dawr awmte NDRF nen an indawr ṭâwm vangin khàr a ni
• Aizawl DC-in containment area-ah a puang
• Lungverh mite pawisa dawrkaite'n an dawng duh lo
• State páwn aṭanga NDRF mite lêt thu hriattir an ni lo
• NDRF mi, state páwn aṭanga lut ni lote'n hripui an vei hnuah an buai ṭan
• Lungverh mi leh sate leh NDRF-te hripui inkai chhàwn theihna tur a awm nual