Hnahthial DC-in Tarpho leh Aithûr a tlawh

Hnahthial DC Vanlalmawia chuan November 28, Inrinni khan Tarpho leh Aithûr khua a tlawh a, sikul leh sorkar hmalakna hrang hrang a enfiah bakah, khawtlang hruaitute nen an inkâwm. DC hi SP Lalbiakkila leh medical officer Dr R Lalsanglura ten an ṭawiawm.

VC leh YMA hruaitute'n an khawtlang mamawhte an lo thlen chungchangah Vanlalmawia chuan, "Hmasawnna kawngah a ṭul ang zela hmalak a ni ang," a ti a; sorkarin khawtlang hmasawnna tura hna a thawhte chu ṭha tak leh neitu rilru púa enkawl turin a chah.

Hnahthial SP Lalbiakkila chuan, Krismas leh kumthar lo thleng turah sorkarin a khap hrang hrangte chu khauh taka kenkawh a nih dawn thu sawiin, khawtlang hruaitute chu an khuaah khapna thupek ngai pawimawh turin a chah a, "Kan district-a khaw ṭhenkhat chu Myanmar aṭanga ruihhlo tawlhna kawng pakhat a ni a, ruihhlo dona kawngah theihtawp chhuah tlân a ngai," a ti.

Hnahthial DC leh amah ṭawiawmtute hian Aithur khuaah ni zung chakna hmanga an khaw châwmtu tui pump-na te, ni zung chakna hmanga kawlphetha megawatt 2.5 siam chhuahna hmun tura ruahman VC-in ram an pek te, sikulte leh health sub centre-te an tlawh. Tarpho khuaah chuan FCSCA department-in kudam an sak tharna tur hmun an enfiah a ni.