Rualbanlo tana sum dah a tam tâwk lo ; Mizoramah rualbanlo 15,160 an awm mek

Mizoramah sorkar chhinchhiah rual­banlo 15,160 an awm mek. Rualbanlote'n sorkar aṭanga ṭanpuina chi hrang hrang an dawn chu state dangte nena khaikhinin a beitham a, Economic Rehabilitation-ah phei chuan sum dah a tam loh avangin kum 2014-15 khan sorkarin sum pek tur a nei lo niin Persons with disability (PwD) office-a thawkte'n Vanglaini palai an hrilh.

PwD hotute chuan, rualbanlote tan Disability Pension-ah mi 200 aia tam dah tur te, Handicapped Student Stipend a tlem avang leh eizawnna tur atana sum dah a tam theih nan leh rualbanlote chhawmdawlna ṭhenkhat tisang ve turin Social Welfare department hotute hnenah budget-ah dah ve turin an nawr ṭhin a; mahse, tun thlengin an la hlawhtling thei lo niin an sawi.

Thu dawn danin, rualbanlote hamṭhatna dawn zinga mi, Disability Pension (state scheme) chu Mizoram sorkarin tun hma aṭanga rualbanlote chhawmdawlna atana a pek ṭhin a ni. Kum 1996-97 aṭanga kalpui ṭan niin, mi pakhat tan thla khatah Rs. 100 zel an pe a, kum 10 hnu, kum 2007-08 khan Rs. 250-ah tihsan a ni.

Disability Pension hi mi pakhat tan Rs. 250 pek tur ni mah se, tun dinhmunah chuan Rs. 200 zel an pe thei a, Mizorama rualbanlo 15,160 tan thla khatah Rs. 50,000 an sêng ṭhin a, kum khatah Rs. 6,00,000 an sêng a ni. Disability Pension hi Rs. 250 tal pek a nih theih nan Social Welfare department-ah an thlen tawh ṭhin a, mahse, a la hlawhtling thei lo a ni.

Rualbanlote hi district pathuma District Employment Exchange-ah a bika inziak lut tura tih an ni a, kum 2005 aṭang khan hna zawng laite chu an inziak lut ṭhin. Employment Exchange (EE) hi Aizawl, Lunglei leh Siaha-ah a awm.

EE-a inziak lutte chu an inziah luh aṭanga kum hnih aia rei hna an hmu lo a nih chuan sorkarin chhawmdawlna atan mi pakhat tan Disabled Educated Unemployment Allowance (state scheme) Rs. 250 zel a pe a, kum khatah mi 25 tan chiah sum a pe thei. He Allowance atan hian thla khatah sorkarin Rs. 6,250 a séng a, kum khatah Rs. 75,000 a séng. Hetih lai hian, kum 2014-15 khan sorkarin sum pek tur a neih loh avangin pek an ni lo.

Kum 2015-16 chhung khan Aizawl EE-ah mi 54, Lunglei EE-ah mi 21 leh Siaha EE-ah mi 15, an vaiin mi 90 an inziak lut a; chu'ng zinga mi 25 chuan Disabled Educated Unemployment Allowance an dawng dawn a, mi 65 chuan an dawng ve dawn lo. Social Welfare hotute chuan, Allowance hi an indawn chhawk dawn niin an sawi.

State sorkarin a pek tho, Handicapped Student Stipend/Scholarship (state scheme) a awm a, pawl 1-4 inkar zirlai pakhatin thla khatah Rs. 30 an dawng a, kum khatah Rs. 360 an dawng. Pawl 5-7 te tan thla khatah Rs. 40 pek niin, kum khatah Rs. 480 an dawng a; pawl 8-12 tan Rs. 85 pek niin, kum khatah Rs. 1,020 pek a ni.

Sorkar kum kal laiah Handicapped Student Stipend/Scholarship dawng thei zirlai 784 an awm. Pawl 1-4 inkarah mi 390 awmin, kum khatah Rs. 1,40,400 an pe a; pawl 5-7 mi 260 awmin, kum khatah sorkarin Rs. 1,24,800 a sêng. Pawl 8-12 zirlai mi 134 awmin, sorkarin kum khatah Rs. 1,36,680 a sêng ṭhin. Kum kal laiah rualbanlo zirlaite stipend/scholarship atana sorkarin sum a sen chu Rs. 4,01,880 a a ni.

Economic Rehabilitation (state scheme)-ah mi pakhat tan kum khatah dawrtê siam nan Rs. 2,450 hman a ni a, vawk leh ar vulhna atan mi pakhatin kum khatah Rs. 4,000 a dawng bawk.

Rualbanlote hi sorkarin a chhinchhiah danah chi riata ṭhen an ni a, thingtlangah mi 8,627 awmin, khawpuiah mi 6,533 an awm mek a ni.

Rualbanlo awm zat
1. Ruh lama harsatna nei (orthopaedically handicapped) - 1,976
2. Rilru lam harsatna nei (mental retardation) - 1,585
3. Khaw hmuh lama harsatna nei (visually impaired) - 2,035
4. Hriatna ṭha lo (hearing impaired) - 3,354
5. Ṭawng lama harsatna nei (speech) - 1,163
6. Rilru lam natna nei (mental illness) - 1,050
7. Rualbanlohna tam tak nei (multiple disability) - 2,083
8. Rualbanlohna dang neite (any other) - 1,914
Belhkhawm - 15,160