Vishal Megamart duh loh lantir nan Vawiinah Aizawla dawr khâr a ni dawn

Mizoram Merchant Association (MIMA) member-te chu Vishal Megamart, Bawngkawna hawn tum duh loh lantir nan Inrinni khan Vishal Megamart dawr tur siam mek bulah an pungkhawm a; vawiinah Aizawla dawrte khâr turin an inhriattir bawk.

Vishal Megamart hi Inrinni khan hawn tum nia an hriat avangin MIMA member-te chu Vishal dawr epah an pungkhawm a, Vishal Megamart hawn an duh lohna chhan hrang hrangte an au chhuahpui. Mahse, Vishal lam hi an la inpeih loh avangin mipui dawr theih turin an hawng lo.

Punkhawmnaah hian Bawngkawn Local Council hruaitute chu kalin, an vengah pun­khawm a, mipui tihthlabár zawnga awm an remtih loh thu an hrilh a; MIMA hruaitute nen an inbiak hnuah MIMA member-te chu an ṭîn darh.

Bawngkawn LC chair­man H Lalduhkima chuan zawhna chhangin, an vengah mi dang tibuai leh tithlabár thei zawnga punkhawm an remtih loh avangin MIMA-te chu ṭîn darh turin an hriattir tih a sawi a, "Tun hnu zelah kan venga boruak tiṭha lo thei leh mi dang tibuaia tithlabár thei zawnga awm kan remti lo," a ti. Vawiin lamah pawh NECS Cup-ah an vengin semi final an khelh dawn avangin boruak dang lo siam an phal loh thu leh, an venga Vishal Megamart a awm chu an pawitih loh thu a sawi bawk.

MIMA hruaitute chuan, Vishal Megamart chu ram leh hnam tan a him loa an hriat avangin dodal tlat an tum thu an sawi. Thu dawn danin, Vishal Megamart hawn duh loh lantirna atan vawiinah Aizawla dawr zawng zawngte khâr an tum a, dawr khâr lo an awm leh awm lo endikin MIMA member-te an duty dawn. MIMA member leh ram leh hnam himna tur duhtu apiangte chu chawhma dar 10-ah Millennium Centre-a kal turin an sáwm a ni.