Home Minister thusawi hriatthiam har ti
Chhimbial Chhantu chuan thuchhuah siamin, Assembly Session neih meka Home minister R Lalzirliana'n Lunglei Police Station sakna tur Chhimbial Chhantuin an duh loh avangin divert a nih tur thu a sawi nia tarlangin, "Hei hi pawi kan tiin, hriatthiam har kan ti hle," an ti.
Chhimbial Chhantu chuan, "Home Minister-in Assembly House meuha dawt sawi a, Lunglei PS sak that duh lo anga Chhimbial chhantu min puh hi a pawi hle. 13th Finance Commiassion-in sum a pek dan dik tak angin tuna police station awmna hmun ngaiah hian sak ṭhat a nih ngei theihna turin a tawp thlengin hma hma kan la dawn," an ti.
Chhimbial Chhantu tarlan danin, February 2015 ah Lunglei Addl. SP chuan Chhimbial Chhantu hruaitu ṭhenkhat lengah sawmin Lunglei PS awm sa chu sak that a nih tur thu te, DIG (SR) quarter sak ṭhatna tur sum hnuh chhuahna atana mipui ram hauh lai hmun pass chu hman phawt a nih tur thute leh a tak taka chulai hmuna sak erawh a nih loh tur thu sawi chhuah a ni. DIG (SR) quarter sakna tur sum hi central lam aṭangin pek tel an ni ta lo.
Hetiang a nih avang hian PWD lam pawhin Lunglei PS sakṭhatna tur sum chu an kutah kawlin, building ding lai chhu chhiain a thar sak dan tur an ruahman nghal a ni. June 2015, thla tawp lama Addl DGP chhim lam fanga zin haw lam chuan Lunglei PS sak ṭhat tura engkim peih fel tawh chu ti danglamin hmun dangah sak a duh thu a sawi a, PWD hriattir nghal a ni.
Chhimbial Chhantu chuan ni 15.10.2015 ah press release siamin,Lunglei PS sak ṭhat tur chu 13th Finance Commission in sum a rawn pek ang takin ahmun ngaiah sak thuai ni se. Sum pawh pen a nih loh na turin hmalak a tum tih puan zar a ni. Home Minister pawhin pisaah ni 3.11.2015 khan Chhimbial Chhantute leh Police lam hotute bakah chhim lam MLA te kokhawmin meeting neih a ni. A hmun ngaia police station sak chu an dinna a ni.
A hmun ngaia police station sa tura sorkar an ngen reng laiin mipuiin hmun an roh leh ui em em laiah sak luih tum a nih tak thu tarlangin Chhimbial Chhantu chuan, "Kan hmel tih mawk tuma police station duh lo ang hiala Home Minister in a sawi hi a pawi kan tiin, kan pai dam mai dawn lo. Sum lo kal chhan ang takin Lunglei PS hi a hmun ngaiah sak ṭhat ni rawh se tih hi kan dinna ngai a ni," an ti.