Kum 5 chhungin lottery-ah vbc. 119.32 hmu Tender loin agent-te tum hnih extend an ni tawh
Kum nga, kum 2012-13 aṭanga 2016-17 (December 2016) thlengin Mizoram sorkar chuan lottery aṭangin cheng vbc. 119.32 a hmu tawh a, sorkar sum báwmah chhûn luh zel a ni. Hetih lai hian, lottery agent-te chu tender chhuah loin an term ṭum hnih pawhseisak an ni tawh.
Assembly session kal mekah MNF member Dr K Beichhua zawhna Finance minister Lalsawta'n ziaka a chhan danin, tun hnai kum nga chhunga lottery aṭanga Mizoramin sum a hmuh vbc. 119.328 bakah hian, lawmman dawngtute'n an lam loh cheng vbc. 2.41 chu sorkarah chhûn luh a ni.
Hetih lai hian, kum 2012-13 aṭanga 2014-15 chhunga lottery aṭanga sum hmuh chu cheng vbc. 24.70 a ni a; hei hi Finance Minister-in thuthar thehdarhtute a kawm ṭuma a sawi nen a inmil lo.
Finance Minister hian December 20, 2016 khan Aizawl Press Club-ah thuthar thehdarhtute kâwmin, CAG-in kum 2012-13 aṭanga 2014-15 chhunga lottery aṭanga sum hmuh tur cheng vbc. 11,808.77 a la hmuh loh thu an tarlan a sawifiahnaah, "Kum 2012-13 aṭanga 2014-15 chhunga Mizoram sorkar sum hmuh tur chu cheng vbc. 25.45 a ni a, hei hi hmuh vek a ni tawh," a ti.
Dr K Beichhua zawhnaah Lalsawta chuan, lottery agent/distributor tur December 20, 2011-a tender tur chhuah aṭanga agent-a thlante chu kum hnih chhung - May 29, 2012 aṭanga May 28, 2014 thleng thawk tura agreement siampui an nih thu a tarlang.
Finance Minister tarlan danin, agent-te hi tender chhuah loin agreement term pawhsei an dil angin pawhseisak an ni. An term pawhsei a nih dan chu, May 29, 2012 - May 28, 2015 thleng leh, May 29, 2015 - May 29, 2018 thleng a ni.
Lottery agent leh Mizoram sorkarin agreement an ziahah extension clause dah a ni a, chumi ang chuan agent-te chuan agreement term extend an dil a ni. Sorkarin ngun taka a ngaihtuah hnuah sale proceed rate sang zawkin agreement a pawhseisak niin an tarlang.
Lalsawta chuan, lottery aṭanga sum hmuhte chu sorkar sum báwmpui (consolidated fund)-ah chhûn luh vek a nih ṭhin thu a tarlang a, "Budget kaltlangin department hrang hrangah sem leh ṭhin a ni," a ti.
Lottery aṬanga sum hmuh dan
(Rupees in crore)
Kum Sorkara lut Prize lam loh
2012-13 385.60 15.00
2013-14 950.74 102.00
2014-15 1133.77 240.00
2015-16 1246.57 2.17
2016-17 1156.12 97.95
(Note: Prize lam loh hi sorkarah chhûn luh a ni)