KHAWTHLIR
Pawisa lem man
Mizoram Police-te chuan Inrinni khan an thudawn bawhzuiin C Lalnunmawia (46) s/o C Lal-khuma, Chanmari West hnen aṭangin pawisa lem (Fake Indian Currency Note) Rs. 50,05,000 an man. Mizoram Police chuan tun hnaiah pawisa lem leng vak Aizawlah a awm nual nia sawiin, fimkhur turin mipuite an ngen.
Women's Month
All Mizoram Women Federation (AMWF) chuan Inrinni khan Heri-tage Lounge-ah khawvela hmeichhiate dinhmun chawisanna thla, International Women's Month kharna inkhawm an hmang a; Indian Society on Tobacco and Health (ISTH), Mizoram Chapter president Lal Riliani'n a hmanpui. AMWF president Dr Jane R Ralte kaihhruaiin 'Issues related to single women/single parent' tih thupui sawihona nghal a ni.
BCM Martarte Ni
Mizoram Baptist Kohhran chuan nimin Pathianni khan Martarte Ni an hmang. Martarte Ni pual hian BCM tualchhung kohhran tinah hun hman a ni a, thupui chu 'Krista thuhretu rinawm' tih a ni. BCM hian March thlaa Pathianni hnuhnûng ber hi Martarte Ni atan an hmang ṭhin a ni.
Thisen pe
Inrinni khan Salvation Army ṭhalai, Saitual area-a mite chuan SA centenary pualin Saitualah Aizawl Civil Hospital tan thisen unit 60 an pe a, a petute mipa 48 leh hmeichhia 12 an ni. Tlangnuam West Branch KṬP-in KTP Day pualin Synod Hospital tan unit 17 an pe a, a petute mipa 15 leh hmeichhia pahnih an ni. Aizawl Civil Hospital tan Kawlkulh Students Union-in unit 13, South Lungpher SU-in unit 8 leh Khawrihnim SU-in unit 5 an pe bawk.
MLA-in enfiah
Kolasib bialtu MLA PC Zoram Sangliana chuan nimin khan Kolasib Project Venga stadium sak mek a tlawh a; hna thawh dan enfiahin, hnathawktu NBCC hotute chu harsatna an neihte ziaka a hnen a hrilh ṭhin turin a chah.