Hindi zirtirtute'n chaw an la nghei zel

Mizoram CSS Hindi Teachers Association (MCHTA) chuan sorkara dah ngheh phûta Chief Minister's Office luhna gate bula chaw an nghei chu an la chhunzawm zel a; damlo chau tawh mi 31 chu Inrinni zan khan Aizawl Civil Hospital (ACH)-ah dah luh an ni.

MCHTA hruaitute hnen aṭanga thu dawn danin, CSS hnuaia Hindi zirtirtute'n chaw an nghei mekah hian damlo leh chau zual mi 160 chuang an awm tawh. ACH me­dical superintendent Dr KL Remsanga sawi danin, chau zual zinga mi 31 chu Inrinni zan khan ACH-ah admit an ni a; damdawi-inah khum an indaih loh avangin ACH hotute'n auditorium-ah khum an dawh belh a ni.

MCHTA hruaitute sawi danin, chaw nghei mek zingah nau pai mekte pawh an awm a, nau pai zinga ṭhenkhat phei chuan nau an chhiat tawh a ni. Harsatna tawkte hi kawṭhalo te, zunthlum leh thisen sang nei an ni hlawm a; nau pawm lai eng emaw zat an awm bawk.

Dr KL Remsanga chuan Vanglaini palai zawhna chhangin, damdawi-ina admit-te hi an ngaihtuahawm lem lo tih a sawi a, an ṭha chho leh deuhte chu an chhuahtir leh nghal zel mai dawn tih a sawi.

Harsatna an tawh mek laia sorkar hotute'n ngaihsak tlaka an ngai lo chu hriatthiam har an tih thu an sawi a; an harsatna tawh mek chungchangah hian ṭawngṭaipui turin Mizoram mipui an sawm a ni.

Inrinni chhuna thli tleh leh ruahsur vangin harsatna an tâwk a, an mutbu leh thawmhnawte a huh nasa tih an sawi. Chaw nghei mekte hi MNF party hruaitute chuan Inrinni khan an tlawh a, tui in tur leh silpauline eng emaw zat an pe a ni.