NCM Member leh CM Hawla an inkâwm

National Commission for Women (NCM) member Rekha Sharma chuan March 24, 2017 tlai khan chief minister Lal Thanhawla chu a chenna banglaah a kâwm a, Mizorama hmeichhiate dinhmun an sawi dûn.

Rekha Sharma chuan, Mizorama a chàm chhunga Mizorama hmeichhiate dinhmun a zir thu leh hmeichhe pawl hrang hrangte nen inkawmhona hun ṭha tak an neih thu a sawi a; ram chhung hmun dang khaikhinin Mizoramah hmeichhiate dinhmun chu a ṭha zawka a hmuh thu sawiin, "Inrêlbàwlna, a bik takin state chhunga inrelbawlna sang ber Assembly leh inrelbawlna dangahte hmeichhe aiawha tun aia an tam a pawimawh," a ti.

Chief Minister chuan, tun aia hmeichhe MLA tam zawk neih chu mimal tak pawha ṭha a tih thu sawiin, "Hemi atan hian kan ngaihtuahna, rilru puthmang leh sûkthlêkte siamṭha a, khawtlang ang pawha hmalakna a awm a pawimawh a ni," a ti a; khawtlang inrêlbawlna village council tinah seat awm zat aṭangin pakhat tal emaw, a aia tam pawh hauhsak an nih thu leh Aizawl Municipal Council-ah pawh hmeichhiate tan seat hauhsak an nih thu a sawi.

Rekha Sharma hi Mizoram State Commission for Women chairperson Vanlalawmpuii Chawngthu, MLA leh member secretary Lalbiakkimi ten an ṭawiawm a ni.