Sorkar hnathawkte'n hlawh an thawh

Mizoram College Teachers’ Association (MCTA) chuan June 23 khan Covid-19 donaa hman turin CM Relief Fund-ah Rs. 41,22,270 an thawh a, HTE mi­nister Dr R Lalthangliana hoin CM Zoramthanga hnenah an hlân. An pawisa thawh hi MCTA member-te'n an hlawhpui aṭanga 5% an thawh khawm a ni.

College zirtirtute hian a hmain ṭanpuina hrang hrang an lo pe tawh a, an pek tawh zawng zawng chu Rs. 1,02,79,210 a tling.

Mizoram Veterinary Service Association (MVSA) member 103-te'n an hlawhpui aṭanga 10% an thawh tling khawm Rs. 12,24,835 chu nimin khan Chief Minister hnenah hripui do nan an hlàn a; a hmain Rs. 13,89,866 leh Rs. 2,67,200 an lo thawh tawh bawk.

June 23 khan Mizoram State Cooperative Service Association (MSCSA)-in an basic pay aṭanga 5% an thawh khawm Rs. 1,05,990 an hlân a, a hmaa ṭanpuina an pekte nen Covid-19 dona atan Rs. 21,42,286 an pe chhuak tawh. Nimin khan Mizoram Audit and Accounts Service Association-in Rs. 2,56,495 an pe bawk a ni.