Sorkarin police khung hran laite an duty tir- ZPM Ṭhalai

ZPM Ṭhalai chuan thuchhuah siamin, ZPM Legislature Party leader Lalduhoma hêk a nih chungchanga Assembly Speaker-in thutlukna a puan nía Assembly House kawta tharum tel loa an punkhawmnaah Bihar inthlana duty zo rawn haw police, home quarantine laite sorkarin a duty tir tih an tarlang.

ZPM ṭhalaite chuan, Covid-19 chungchanga inkaihhruaina (SOP) bawhchhiaa home quarantine lai duty tir chu mak an tih thu an tarlang a, "A ṭhen phei chu swab sample test result nghak mekte an ni," an ti.

ZPM Ṭhalai chuan, "Dan ngai pawimawhtu intiin politics-a mahni khingpuite beih nan an dan siam ngei an bawhchhia hi kan duh lo. An khingpuite'n hri kai darh se, ti ni àwm taka home quarantine mekte an duty luihtir hian MNF hruaitute rilru khâkzia a pholang chiang hle," an ti a; mipui himna aia phuba dah chungnung zawkah MNF kaihhruai sorkar an puh a ni.

Mizoram Youth Commission-in November 27, Zirtawpni zan dar 8 khan curfew bawhchhiain moral reforms hun an buatsaih tih sawiin ZPM ṭhalaite chuan, "Mi harsa zawk leh thil ti thei lo zawkte lakah rorelna lek a nih lai leh, chu'ng mite pawisa chawi tling khawm ringawt pawh cheng tam tak a nih lai a, sorkarin a dan zam a bawhchhia hi pawi kan ti hle. Rorelna dik duhtu nia insawi MNF sorkar hian thil engkim rem leh rem loa politics phuba lâkna tura an hmang hi sim rawh se," an ti.