March 20, 2019-a pass tawh MLP Act-in Rules a la nei lo

Excise & Narcotics depart­ment (END) hotute chuan Vanglaini palai zawhna chháng­in, The Mizoram (Liquor Prohibition), Act (MLP Act) kenkawhna tur Rules peih a la nih loh thu an sawi. MLP Act siamna tur Bill chu Assembly House-ah March 20, 2019 khan pass a ni.

END hotute chuan, MLP Rules chu an buaipui mek thu sawiin, "Tun dinhmunah chuan peih a la ni lo. Rules hi awm lo mah se, Act a awm tho avangin zu khapna dan kalpui kawngah harsatna kan tâwk lo," an ti.

Zu man sa tihral dan chung­changah END hotute chuan, Rules awm lo mah se, sorkarah a ṭul angin dilna an siam a, sorkar remtih dan anga tihral mai theih a nih thu an sawi.

Mizoram Liquor Total Prohibition (MLTP) Act hmangin hun eng emaw chen Mizoramah zu khap a nih hnuah July 10, 2014 khan Assembly House-ah Mizoram Liqour (Prohibition & Control) Bill pass a ni a; MLPC Act hnuaiah March 16, 2015 aṭangin phalna neite'n zu zuarin, phalna neite'n zu an lei thei ṭan a ni.

Mizoram sorkar chuan zu khapna tur bill, The Mizoram Liquor Prohibition Bill, 2019 chu March 20, 2019 khan a pass a, MLP Act siam a ni. MLP Act hmang hian April 1, 2019 aṭangin zu khap tum ni mah se, election model code of conduct avangin tum hunah khap theih a ni lo.

Mizoram sorkar chuan MLP Act hman a nih theihna atan May 28, 2019 khan notification a tichhuak a, chumi hnuah MLP Act chu hman zui a ni. MLP Rules chu December 19, 2019 khan notification hmangin tihchhuah a ni. MLP Rules chungchangah hian Excise & Narcotics department thuchhuah chuan, "He Rules hi The Mizo­ram Liquor (Prohibition) Act-a hmalak dan tur kaihhruaina a ni," a ti.

Hetih lai hian, January 13, 2020 khan chief minister Zoram­thanga chuan Mizo Hnam Rûna thu a sawiah, MLP Rules chu Cabinet-in a ngaihtuah tur a nih thu a sawi tawh a ni.