MSO, Delhi thuchhuah a dik loh thu Siaha district-a doctor-te'n an puang
Siaha District Doctors Welfare (SDDW) chuan, Mara Students' Organisation (MSO) Joint Hqrs., Delhi-in June 23, 2020-a thuchhuah an siamah, Siaha district-a Covid-19 veite doctor leh nurse-te'n an tlawh khat anga an sawi chu thu dik loh a nih thu leh, thu dik loa medical lam mite puh an nih avangin an làwm loh thu an tarlang.
SDDW tarlan danin, Siaha district-ah Covid-19 vei an awm hma aṭangin ruahmanna siamin, a veite awmna tur Covid Care Center (CCC) an ruahman a, an rin aia haw an tam avangin CCC-te chu quarantine center atan hman a ni. Chuvang chuan, Covid-19 vei natna lang chhuak (symptomatic)-te dahna tura ruahman Dedicated Covid Health Center (DCHC) chu natna lang chhuak lo (asymptomatic) dah hran nan hman a ni.
Covid-19 vei enkawl ngai (symptomatic) an awma enkawl turin medical team pariat an siam a, team pakhatah doctor pakhat, nurse pahnih leh group-D staff pakhat zel an awm.
Mumal takin ruahmanna siam mah se, Covid-19 veite chauh an buaipui thei lo tih sawiin SDDW chuan, "Ni tin OPD-ah kan ṭhut a ngai a, casualty-ah kan duty a ngai a, damdawi-inah damlo an khat reng bawk. Covid-19 vei kan neihte hi natna lang chhuak lo leh insawiselna nei lo vek an ni a, chuti chungin kan ngaihven reng a, nurse pahnih leh group-D staff pakhatin an riahchilh a, harsatna an neih palha an thlenna tur WhatsApp group siam a ni," an ti.
Siaha district-a doctor-te chuan, Covid-19 vei enkawl dan tur ang taka enkawl a nih chuan damdawi-in OPD-a ṭhu tur an awm lo thuai dawn tih sawiin, "Casualty-ah on-call la tur kan awm lo ang a, emergency-a zai ngai kan zai thei lo ang. Damdawi-ina damlo dangte'n enkawltu an nei lo ang a, hospital a collapse ang tih kan hlau hle," an ti a; Covid-19 veite chu asymptomatic case vek an nih avangin doctor-te'n an riahchilh lo a, a khát tawkin an tlawh reng a, a ṭul huna riak lut turin an inrin reng thu an sawi.
SDDW tarlan danin, June 8 aṭangin doctor pahnih - Dr V Dochai leh Dr Lalnuntluanga Ralte te an lut a, Covid-19 veite chu vawi riat an tlawh tawh. A tìr aṭangin nurse pahnih leh group-D staff pakhatin an riahchilh a, damdawite an pe ṭhin. Zíngah leh zanah doctor-te'n an be ṭhin bawk.
Siaha district-a doctor-te chuan, MSO, Delhi-in Covid-19 veite ngaihsak lo leh June 8 aṭangin vawi khat chiah la tlawh anga an puh chu dâwt a nih thu leh doctor-te rilru an tihnat thu an sawi a, "Phunnawi loin kan thawk mawp mawp a, hlauh leh hlauh loh kan sawi ngai lo a, hah thu pawh kan sawi ngai lo. Kan tih tur a ni tih kan hria. Chutih laia dâwt leh rinthua min puh hi kan ngaithiam thei bik lo a ni," an ti.
SDDW chuan, damlote enkawl chu an hna a nih avangin an thawk zel dawn tih sawiin, "Fakna ṭawngkam kan beisei lo a, dâwta inchhuah mualpho erawh kan duh bik lo. Tun aṭang chuan hre chiang loin medical lama thawkte rilru hliam leh tihnual zawngin thu i chhuah tawh lo ang u," an ti a; mipui thlàwpna leh ṭawngṭaipuina an ngen rualin, MSO, Delhi chu thu dik lo an chhuah avanga ngaihdam dil turin an phût a ni.