Minister-in kawng siam tur a enfiah

Champhai South bialtu MLA TJ Lalnuntluanga, minister of state leh district official-te chuan nimin khan Champhai Vengthar leh Zote inkar kawng zauh leh chei hnûm dan tur an enfiah.

TJ Lalnuntluanga chuan, hmasawnna ruhrel siam leh hnathawhna tura sorkar sum lo kalte a nihna ang taka hman a nih theih nan ṭan rual a ngaih thu a sawi a; sorkar official leh khawtlang hruaitute chu ngaih­tuahna thianghlim tak hmanga ram leh khawtlang tana thil ṭha ngaihtuah ṭhin turin a chah.

Khawvel changkang zel leh khawpui ṭhan dan thlirin, Champhai Master Plan siama chak taka hmalak mek a nih thu sawiin TJ Lalnuntluanga chuan, "Champhai khawpui tâwt tih­ziaawm leh inkalpawh tawnna kawngpui ṭha zawk awm theihna turin ring road siama hmalak ṭan a ni tawh," a ti a; Zotlang leh Tlangsam inkar kawng chu lian leh ṭha zawka siam mek a nih thu a sawi.

Champhai South Bialtu MLA chuan, Covid-19 vangin duh ang­in hmasawnna hnathawh kawng­ah hmalak a harsat rih thu sawiin, "Kawng siam tur chu nakin zel ngaihtuaha Champhai leh a chhehvel khuate tana chhawrnahawm tak tur a nih avangin thawh lailâwk nan MLA fund aṭangin Rs. 5,00,000 hman a ni ang," a ti.

Champhai Vengthar leh Zote inkar kawng hi km. 1.6-a thui niin, metre 9 vel thlenga zauh tum a ni a; Champhai leh a chhehvel, Hnahlan tlangdung khuate'n awlsam leh rang zawka Champhai an luh leh chhuah theihna tur kawng a ni. PWD-in chiang zawkin an zir chiang ang a, DPR siamin a ṭul anga hmalak chhunzawm tum a ni.