Covid-19 vei 231 zinga mi 151 an chhuak tawh

July 12, Pathiannia Zoram Medical College (ZMC) laboratory-a swab sample 94 endikah Covid-19 vei mi pali hmuh chhuah a ni a, chutih laiin, nimin khan Covid-19 vei dam tawh mipa pakhat chu chhuahtir a ni. Mizoramah hripui vei mi 231 hmuh chhuah tawh niin, mi 151-te chu damin an chhuak leh tawh. 

Pathiannia swab sample endik 94-te chu State Referral Hospital (SRH)-a dah (admit) sa mi 32 leh Aizawl district mi 62-te an ni a, an zingah hian Lungverha awm NDRF mite leh 5th IR police eng emaw zat an tel. Endik zinga mi 90-te Covid-19 laka an fihlîm laiin, mi pali-in an vei tih hmuh chhuah a ni a; hripui veite hi NDRF mi, mipa vek niin, Andhra Pradesh, Assam, Haryana leh Manipur mite an ni.

Hetih lai hian, Champhai district mi Covid-19 vei, a vei tawh lo tih July 7-a finfiah tawh mipa pakhat chu nimin chawhnu khan Champhai Dedicated Covid Health Centre aṭangin chhuahtir a ni a; Champhai district-ah hian hripui vei mek pakhat a la awm.

Nimin tlai dar 5 thlenga hriat theih chinah, Mizoramah Covid-19 vei mi 231 hmuh chhuah tawh a ni a, chu'ng zinga vei tawh lo finfiah tawh mi 151 chu chhuahtir an ni tawh a, la vei mek mi 80 an awm. Covid-19 vei mek zinga mi 23 chu SRH-ah enkawl an ni a, mi 57 chu DCHC leh Covid Care Centre (CCC)-ah enkawl an ni.