Health care-ah theihtawp kan chhuah ; Nghak hrâm hrâm turin mipui kan duh - Health Minister

Health & Family Welfare (HFW) minister Dr R Lalthangliana chuan, Mizoram State Health Care Scheme (MSHCS) hnuaia leiba tam lutuk tihziaawmna atan theihtawp an chhuah mek niin a sawi a; mipuite chu lo nghâk hrâm hrâm turin a chah.

Vanglaini palai zawhna chhangin Health Minister chuan, MSHCS atana sum buaipui chu a department kaihhnawih ni chiah lo mahse Chief Minister nen an sawi dun reng thu a sawi a, "Tun hnaia Delhi ka zin pawh khan CM remtihnain MSHCS atan Asian Development Bank (ADB) sum kan pûk theih nan Union Finance Minister leh official-te ka kâwm a ni," a ti.

Dr R Lalthangliana chuan, central-a Finance Minister leh official-te chu Mizoramin ADB sum pûk a mamawh tak zet thu a hrilh tih sawiin, "Keini ang state tan chuan ADB aṭanga sum pûk a nih loh chuan MSHCS kalpui a buaithlak thu chiang takin ka hrilh. Covid-19 léng nen, kan state sum aṭang chuan tih ngaihna a awm lo," a ti a, ADB sum pûk theih ngei an beisei thu a sawi.

HFW Minister chuan. ADB aṭangin cheng vbc. 1,000 pûk tum a nih thu sawiin, "ADB aṭangin soft loan kan pûk theih chuan MSHCS-a harsatna zualpui chinfel theih ngei a nih kan ring. Mipuite min lo nghak a, min lo ngaichâng hram hram turin kan ngen a ni," a ti.

Tarlan tawh angin, Vanglaini-in RTI Act hmanga a zawhna Health department-in an chhan danin, MSHCS hnuaiah damlo inenkawlna senso April 2021 thleng pek a ni tawh a, bill pek loh Rs 68,63,52,238 a la awm.

Bill la pek loh mi 25,765 zinga 22,956 chu damlo pangngai an ni a, an senso bill chu Rs 64,42,43,706 a ni. Bill dang 2,809 chu Covid-19 damlo bill, Rs 4,21,08,532 a ni thung.

Dr R Lalthangliana chuan, tun hnaia Delhi-a a zin ṭumin Bangladesh nena insumdawnna atana pawimawh Land Custom Station chungchangah Ministry of Home Affairs leh Land Port Authority of India hotute a biak thu a sawi a, "Hlawhtlinna kan hmuh ngei ka beisei. Bangladesh High Commissioner pawh an ram lama harsatna a awm loh nan theihtawp chhuah turin ka hrilh," a ti.