Naupang venhimna dan zirho a ni
Nimin khan Aijal Club-ah 'Sensitization cum Consultation Workshop on Handling POCSO Cases for Advocates of DLSAs/Procecutors, Special Juvenille Police Units & CWPOs' buatsaih a ni a, Rajya Sabha MP K Vanlalvena'n a hawng.
Naupang kaihhnawih thubuai khawihtu leh buaipuitute tana Protection of Children from Sexual Offences (POCSO) Act, 2012 zirhona hi National Commission for Protection of Child Rights (NCPCR) leh Mizoram State Commision for Protection of Child Rights (MSCPCR)-te buatsaih a ni a; kum 2020 chhung khan POCSO Act hnuaiah Mizoramah thubuai 105 ziah luh a ni a, India hmarchhakah a tamna ber pathumna a ni tih tarlan a ni.
K Vanlalvena chuan, hnam changkang leh hmasawn apiangin naupang dikna humhalh leh naupang venhim an ngai pawimawh tih sawiin, "Naupangte hi hnam rohlu ber an ni a, naupang an nih laia an chanvo humhalh hi ram leh hnam anga kan tih tur pawimawh tak a ni. Tih tur leh tih loh turte kan hriat a pawimawh," a ti.
Naupangte chu an mamawh anga enkawl an nih chuan an puitlin thlengin rah ṭha a nei tih sawiin K Vanlalvena chuan, "An nihphung tur chhernaah naupan lai aṭanga bul ṭan a ngai tih hre thar ila. Dan angin humhimna an dawng em, naupang chanvo humhalh sak an ni em tih hi inzawh fo tur a ni," a ti a; naupang himna chung changa thawktute chu zirtirna uar zel turin a chah.
Zirhonaa National Crimes Record Bureau buatsaih 'Crime in India 2020' report an tarlan danin, kum 2020 chhung khan POCSO Act hnuaiah Mizoram aṭangin thubuai 105 ziah luh a ni a; hmarchhak state-ah Assam-ah case a tam ber a, Meghalaya-in dawtin, Mizoram chu pathumna a ni.