Kuhva rah tawlh rûk chungchangah sorkar insawifiahna hun pek belh
Myanmar lam aṭanga Mizorama dan loa kuhva rah tawlh rûk chungchangah Gauhati High Court, Aizawl Bench chuan Mizoram sorkar chu insawifiah turin a hriattir tawh a, insawifiahna thehluh hun a lo pek tawh chu chawlhkar thum a pek belh.
Myanmar aṭanga dan loa kuhva tawlh rûk chungchangah hian social activist Vanramchhuangi chuan April 29, 2022 khan Gauhati High Court Aizawl Bench-ah public interest litigation (PIL) a thehlut a; chu chu High Court chuan May 6, 2022 khan ngaihtuahin, thu tlingah ngaiin a pawm a, Mizoram sorkar chu insawifiah turin (PIL chhanna pe turin) chawlhkar li hun a pe a ni.
Petition chu nimin khan judge pahnih - Justice Nelson Sailo leh Justice Marli Vankung te ṭhutna Gauhati High Court Division Bench-ah ngaihtuah leh a ni a; a hmaa insawifiah tura tih tawhnaah sorkar ukilte chuan chhànna an la pe thei lo. Sorkar ukilte chuan chhan lêtna hun chawlhkar thum chhung an dil belh a, an dil angin High Court chuan a remti a ni.
Nimina High Court hearing-ah hian inlan tura ngaih Central Bureau of Investigation (CBI) leh MAMCO aṭangin inlan an awm lo.
Thu dawn danin, kuhva rah tawlh rûknaah kuhva rahte chu Mizorama thar a ni tih lantirna turin MAMCO-in certificate of origin a pek chhuah avangin Court chuan MAMCO hotute chu inlan turin a hriattir a; kuhva tawlh rûk chungchang chhui turin CBI tih an nih avangin CBI aiawhte pawh Court-ah an inlan a ngai a ni.