KHAWTHLIR

Online-in bill Pek theih rih loh
Power & Electricity department chuan, an department website leh Bharat Bill Payment System (BHIM, Phonepe, Gpay, etc.) hmanga electric bill online kaltlanga pek ṭhin chu tun June thla bikah a theih dawn loh tih an tarlang. Online-a bill pek theih loh chhan chu software thar an hman vang a nih thu tarlangin, department-in counter a buatsaihah bill pe rih turin mipui an ngen a ni.

Thisen pe
Mizo Higher Secondary School NSS unit chuan nimin khan Civil Hospital, Aizawl Blood Bank-ah thisen pek huaihawtin, thisen unit 33 an pe a, petute mipa 31 leh hmeichhia pahnih an ni.

Ram dang bike Hman khap
Lawngtlai district magistrate Amol Srivastava chuan, Lawngtlai district-ah ram dang bike hman khap a nih thu a puang a; thupek bawhchhiate chu Motors Vehicle Act, 1988 hmanga hrem theih an nih thu a tarlang.

MLA-in tlawh
Mizoram Youth Commission chairman Dr Vanlalṭanpuia, MLA chuan nimin khan Sports & Youth Services department hmalaknaa siam mek Tuidama Laldenga Football Ground leh Kawrthaha Sports Academy a tlawh a; ṭhalaite hmakhua ngaia Mizoram sorkarin hmun hrang hranga infiamna hmun a siam chu lawmawm a tih thu a sawi.

Invên dan sawiho
Lunglei District Disaster Management Authority chu nimin khan an chairman Kulothungan A, bawrhsap hoin an ṭhukhawm a, khuarel chhiatna laka invên dan tur leh chhiatna a thlena hmalak dan tur an sawiho. Fûrpui chhunga chhiatna thleng palh thei laka invênna tura an hmalakna leh hmachhawpte sorkar deparment hrang hrangte'n an tarlang.

Environment Awareness
Green Mizoram Network chuan Environment, Forest & Climate Change department bultumin nimin khan Mizoram College of Nursing (MCON)-ah Environment Awareness Campaign an buatsaih. Environment siam-
ṭhatna lama thawk ṭha chawimawina, IPVM National Award 2000 dawngtu Rongura Hrahsel-in thil pawimawhte a sawi a ni.

Meizial man
Saitual police-te chuan June 8, Nilaini khan Saitual aṭanga Saichal panna kawng péngah lirthei pathum aṭangin ram dang aṭanga dan loa lak luh ram dang meizial (foreign cigarette) báwm 191 an man a, lirthei khalhtute an man tel nghal. Meizial an mante chu cheng nuai 25 man a ni.

Taxi khalhtute tan training
Lirthei khalh leh a kaihhnawih thil chi hrang hrang taxi khalhtute zirtirna Vanapa Hall-a neih chu nimin khan chhunzawm a ni a, Transport secretary KT Beicho-in a hmanpui. Training hi ni thum chhung buatsaih a ni a, nimin bikah chuan taxi sticker A khalhtu mi 1,003 an tel a; traffic rules, awm dan mawi leh lirthei kaihhnawih dan hrang hrang zirtir an ni. Thawhlehni leh Nilaini khan taxi sticker B leh C khalhtute tan buatsaih a lo ni tawh