CADC CEM thar Buddha Lila Chakma
Chakma Autonomous District Council (CADC)-a MNF MDC Buddha Lila Chakma chu Lawngtlai bawrhsap Amol Srivastava-in nimin khan chief executive member (CEM) atan rinawmna thu tiamtirin a la lut. CADC sorkar term 10-naa CEM lak luh vawi ngana a ni.
CADC-ah hian member of district council (MDC) 20 awmin, MNF party MDC vek an ni a, chutih laiin, CADC sorkar hi a nghet lo hle. Tuna term kal mek, term 10-na chhungin CEM ṭum li paih thlak a ni tawh a, nimina CEM lak luh chu term kal mek chhunga CEM lak luh vawi ngana a ni.
Tuna CADC sorkar term hi kum 2018 inthlan aṭanga inṭan a ni a, inthlan hnua CEM hmasa ber chu Santi Jiban Chakma a ni. SJ Chakma chu paih niin, Rashik Mohan Chakma chu CEM a ni a; a hnu rei lo teah RM Chakma pawh paih a ni a, Durjya Dhan Chakma chu CEM a ni ve leh. DD Chakma pawh CEM a ni rei lo a, paih a nih hnuah RM Chakma bawk CEM a ni leh a; RM Chakma chu May 9, 2022 khan paih thlak a ni leh a, Budhha Lila Chakma chu nimin aṭangin CEM a ni ve leh ta a ni.
CEM thar Buddha Lila Chakma hi Vaseitlang bial aṭanga thlan tlin a ni a, tun hma pawhin CEM bakah, chairman leh executive member-te pawh lo ni tawh a ni.