KHAWTHLIR

Mizoram sorkarin Covid-19 hri leng avanga Aizawl khawpuia inkaihhruaina a siam, zan dar 8:00 hnu lama pawn chhuah phal loh chu kawngpui lûnlaiah zawm hlawh mah se, hmun dang zawngah zawm a hlawh lo sawt hle a, zana lirthei veivak leh dawr hawngte pawh an awm tih Vanglaini chuan a finfiah. Pathiannia lirthei tlan chhuah phal loh pawh kawngpui lûnlai ni loah chuan zawm a hlawh ṭha tawk lo.  Vanglainiin a biak pawhte chuan Local Level Task Force-te an huam chhung ṭheuha an duty loh chuan mipuiin sorkar thuchhuah an zawm ṭha tawk lo hle tih an sawi.

November 28, Inrinni khan KṬP, Bawngkawn Bethel Bial chuan Synod Hosital tan mipa 23 leh hmeichhia pangain thisen unit 28 an pe a; KṬP, Hunthar Branch pawhin Synod Hospital tan unit 20 an pe. ECM KTP Laki Bial chuan Siaha District Hospital tan mipa 37 leh hmeichhia pakhatin thisen unit 39 an pe. ṬKP, Bualte leh Ṭhaizawl unit-te pawhin Civil Hospital, Lunglei tan thisen unit 31 an pe bawk.

46 Assam Rifles chuan Inrinni khan Gilead Special School naupangte hman turin wheelchair, beng dár, zirna hmanrua leh white board chi hrang hrang, almirah, microphone leh thil dangte an pe. Bungruate hi commandant Col. Viplav Tripathi-a'n Gilead Special School Principal hnenah a hlân a ni.

Champhaia Legal Metrology enforcement staff-te chuan November 27, Zirtawpni khan MIZOFED Gas Agency, Champhaia dah tur eirawngbawlna gas thlengte an endik a, bûk tling lo bûr 20 an hmu chhuak. Gas phurtu truck driver Abdul Khalik Laskar, Silchar chu Legal Metrology Act, 2009 hmangin an hrem nghal a ni.

State Referral Hospital-ah Covid-19 vei mi 34 enkawl mek niin, chu'ng zinga pahnih chu nimina dah luh thar an ni a; ICU-ah pakhat a awm. SRH-ZMC Bulletin tarlan danin, ICU-a awm mek chu oxygen hmantir a ni. Mi 34 zingah kum 60 chung lam mi paruk leh kum 14 hnuai lam pathum an tel.