Larsapin CIJWS leh ramri a tlawh

Governor Dr Hari Babu Kambhampati chuan nimin khan Counter Insurgency and Jungle Warfare School (CIJWS), Vairengte leh, Mizoram ramria CRPF duty post a tlawh.

CIJWS-ah hian Governor hi an commandant Maj.Gen. Rajiv Thapar leh officer dangte'n Information and Research Centre-ah lo dawngsawngin, CIJWS kalphung leh sipai hnena an thil zirtir dan tlangpui an hrilhfiah a; rál lemchan an entir bawk. Larsap hi Kolasib DC John LT Sanga leh SP Vanlalfaka Ralte ten an ṭawiawm.

Governor hian Mizoram leh Assam inrìnaa ramri vengtu CRPF-te awmna a tlawh a, CRPF DIG Shah Nawaz Khan leh a thawhpuite'n an lo dawngsawng a; ramri venhim hna an thawh dan leh an dinhmunte a zawt a, Mizoram sorkar hmalaknate a enfiah a ni.

Hari Babu Kambhampati hian Vairengte khaw chhunga Pradhan Mantri Ujjwala Yojana kaltlanga eirawngbawlna gas connection dawngtute leh Pradhan Mantri Awas Yojana hnuaia in sak ṭanpuina dawngtute a tlawh nghal a; sorkar laipui scheme hmanga hamṭhatna la dawng kim lote'n an dawn thuai a beisei thu a sawi.

Governor hian Serlui-B Hydel Project a tlawh bawk a, Power & Electricity chief engineer Lalbiaksanga'n kawlphetha siam chhuah dan tlangpui a hrilh. Larsap chuan, kawlphetha tam zawk siam chhuah a nih theih nan ruahmanna siam a ṭul thu a sawi a ni.