Pastor pension tawhte politics-a an Inhman dan tur SEC-in a ngaihtuah

Mizoram Presbyterian Kohhrana rorelna sang ber dawttu, Synod Executive Committee (SEC) chu June 7-9, 2022 chhung khan Synod Office-a JM Lloyd Hall-ah an ṭhu a, ṭhutkhawm vawi 297-na niin, member 141 an kal. An thu ngaihtuah zingah pastor pension tawhte politics-a an inhman dan tur kaihhruaina chungchang a tel.

SEC hi moderator Rev.Dr Vanlalnghaka Ralte-in a kaihruai a, thu rel tur 57 chhawp a ni. An thu ngaihtuah zingah, Presbyterian Kohhran pastor pension tawhte politics-a an inhman dan tur kaihhruaina a tel.

Pastor pension tawhte politics-a an inhman dan tur kaihhruaina siam hi kum 2019-a Synod Inkhawmpuiah rêl a ni a, SEC bawhzui tura dah a ni.

Officers Meeting-in rua-hmanna a siam chu SEC-in a pawmpui hnuah Synod Inkhawmpuiah thlen a ni a, Inkhawmpui chuan SEC ennawn leh turin a tih avangin SEC chuan a bawhzui zel a, Synod Inkhawmpuiah thutlukna la siam leh tur a ni.

SEC Meeting thu ngaihtuah zingah Myanmar ráltlânte dawnsawn dan tur chungchang, missionary lâk dan enṭhat, contract missionary-te chungchang zirchianna leh rawtnate a tel bawk.

Synod secretary Rev. ZD Lalhmachhuana tarlan danin, Mizorama Myanmar ráltlân, khawchhak tlangdunga pastor bial pakua huam chhunga chhungkua 1,418 hnenah Mizoram Synod hmingin Rs 20,00,000 pek a ni a; SEC 296-na leh 297-na inkarah Synod Relief Fund aṭangin harsatna tuarte hnenah ṭanpuina Rs. 42,43,000 pek a ni bawk.