Kan CM aia thil ti thei hmun dangah an awm ka ring lo - MNF Vice President

Nimin khan MNF chuan Chandmary Inpui, Lawngtlaiah political training an buatsaih a, an hun hmanpuitu MNF vice president Lalthlengliana chuan Mizoram Chief Minister anga thil tithei hmun dangah an awm a rin loh thu a sawi.

MNF Vice President chuan Congress-in thu chauha an puan district panga chu kum 1998-ah MNF sorkarin a function tir nia sawiin, "Kum 2008-a district thar pathum kan pek - Hnahthial, Sailtual leh Khawzawlte chu Congress kum 10 sorkar tihpuitlin duh loh pawh tun sorkar hian thla 8 chhungin kan tipuitling vek," a ti.

Hripui, ramri buai, lirnghing, raltlan leh ran pul hri karah Zoramthanga sorkarin Congress kum 10 thawh ai khan a thawk tam zawk nia sawiin Lalthlengliana chuan, "Kan CM anga thil tithei leh taima hi hmun dangah an awm ka ring lo. Union Budget-ah bamboo link road cheng vbc. 100 leh Aizawl by-pass road vbc. 500 pek kan ni," a ti a, central budget aṭanga direct-a sum hmuh hi tunhmain a la awm ngai loh thu a sawi.

MNF Vice President chuan eptute chungchang sawiin, "ZPM nihna mipuiin kan hre chiang tawh. MLA inthlan kha an len lai ber a ni. Tunah chuan an hruaitute inkar a khi a, bel keh phuarkhawm - tui pai thei lo ang an ni. Congress chu India ramah an tlachhe ta, state inthlanah an artelukawn lo chauh zel. Mizoramah chuan Pu Hawla khan la kaihruai sela MLA pali panga an nei mahna, Pu Lalsawta ‘ṭhat loh theih lohna bawm’ an tih hi chu 'Ṭhat theih reng reng lohna bawm' tih tur ni zawk awm tak a ni," a ti.