Thing ṭiak tuamna sarângte paih loa la khawm turin chah

Mizoram State Pollution Control Board (MPCB) chuan thuchhuah siamin, Mizorama thing ṭiak phuntute chu thing kûi ṭiahna atana hman sarângte paih darh mai lo a, a paihna tura siamah paih ṭhin tur leh hâl lo turin an chah.

Mizoram mipuite'n thing phun an uar sâwt hle tih sawiin MPCB chuan, "Hmun tinah páwl leh mimal ṭhahnemngaiin kan phun a, sik leh sa nuam, boruak thianghlim, ram hring nuam leh tuihna tam zawk kan neih phah ngei a rinawm a, a lawmawm hle a ni," an ti a; chutih rualin, fimkhurna tur a awm thu an tarlang.

MPCB chuan, "Thing ṭiak phun tur kûi ṭiahna atana hman sarâng (polypot)-te kan ngaihven zui a pawimawh ta hle mai. Kan paih darh mai mai chuan leilung tichhetu a ni dawn tih hria ila, thing phuntute zawng zawngin sarâng hnutchhiah loh hram i tum ang u," an ti a; thing ṭiak tuamna sarângte chu lâk khawm vek a, sorkarin a paihna tura a ruahmanah chauh paih tur leh hâl lo turin mi tin an ngen a ni.