Zirlai leh infiammi ti ṭhate chawimawi

Lunglei Venglai Branch YMA chuan June 8, Nilaini zan khan Lunglei Cultural Heritage Centre-ah YMA kumpuan hawnna leh veng chhunga zirlai leh infiamna lama ti ṭhate chawimawina an buatsaih a, minister C Lalrinsanga, bialtu MLA-in a hmanpui.

C Lalrinsanga chuan, YMA kumpuan 'Ram leh hnam humhalh’ tihlawhtling turin mi tin an pawimawh tih sawiin, "Ram leh hnam humhalhna kawng ṭha ber zinga mi chu zirnaa hmasawn a ni. Mizoram chhim lam hi zirnaah kan tlahniam tawh hle a, tun hma chuan chhim lam hi zirna leh ram hruainaah hma hruaitu kan ni ṭhin a, chumi chu chhawm nung thar leh turin ṭan ila ang u," a ti. Zirlai leh infiammi ti ṭhate chu tum mumal neia chhungkua, khawtlang leh ram tana chhawr tlak nih tum turin a chah a ni.