BPL-te puitu tur pawl a ding

Mizorama mirethei zual, below poverty line (BPL)-te'n an chanvo dik taka an chan theihna atan ṭhalaite eizawnna dappui turin Church Auxiliary for Social Action (CASA) bultumin People Alliance For Mizoram (PAFM) din a ni.

PAFM-ah hian pawl panga - CASA, Cod Nerc, Centre for Peace and Development (CPD), Lairam Social Mission (LSM), Mizoram Baptist kohhrana Relief and Development Department-te an tel.

PAFM hi Cord Nerc dintu B Lalchhanzova'n nimin khan SIRD conference hall-ah a hawng a, hruaitu thar an inruat nghal. Pawl pangate hian mi harsa leh ṭanpui ngaite tan hma an la ṭhin a, Mizoramah khaw 69-ah community based organization leh district level-ah people organization panga an nei. Awmze nei leh chak zawka BPL chhungkua bakah, mi harsa leh ṭanpui ngaite leh ṭhalaite eizawnna kawng dappui leh kawhhmuh kawngah nasa zawka hmalak an tum a ni.