Minister-in Lunglei District Jail a tlawh

Minister C Lalrinsanga chuan nimin khan a bial chhunga awm Lunglei District Jail a tlawh a, MLA fund Rs 60,000 sênga ruahman jail tángte mamawh chi hrang hrang a hlân.

C Lalrinsanga chuan, jail táng mekte chu beidawng lo tur te, jail chu an nun siamṭhatna hmun atan hman tum tur te, an chhuah hunah khua leh tui ṭha, ram leh khawtlang tana mi ṭangkai ni tura inpuahchah turin a chah a; an mamawhte inthlahrung loa a hnena thlen ṭhin turin jail thuneitute a chah bawk.

Lunglei DC Kulothungan A pawhin thu sawiin, Lunglei District Jail-a tángte chu jail-a an awm chhunga thiamthil zirna (skill development) tur a ngaih pawimawh thu leh chumi lamah chuan chak zawka hmalak a tum thu a sawi.

Minister C Lalrinsanga hian jail tan TV lian, ṭingṭang pahnih, emergency light, bawlhhlawh báwm, sanitary pad, thosi hlauh, table tennis ball leh, volleyball leh a lèn panga a pe a; tángte'n an thil siamte an lo pe ve bawk.