Covid-19 vei an pung leh hret

June 8, Nilaini khan Mizoramah Covid-19 vei mi 29 hmuh chhuah a ni a, hripui vei hmuh zat leh positivity rate a sang leh hret. Nimin khan hripui vei dam tawh mi 15 chhuahtir an ni a, Covid-19 positive thi an awm lo.

Nilainia Covid-19 positive hmuh chhuahte chu mipa 13 leh hmeichhia 16 an ni a; Rapid Antigen Test hmanga hmuh chhuah vek niin, positivity rate 7.09% a ni. Mi 29 zinga 14 chu Saitual district-a Buhbân khaw mite an ni.

IDSP record angin, Mizoramah Covid-19 vei 2,28,478 hmuh chhuah a ni tawh a, mipa 1,06,371 leh hmeichhia 1,22,107 an ni a, mipa aiin hmeichhia 15,736-in an tam zawk. Nimin tlai dar 5 thleng khan mi 2,27,671 (99.65%) chhuahtir an ni tawh a, mi 700 (0.31%) thi tawhin, enkawl mek mi 107 (0.04%) an awm.

Nimin tlai dinhmun angin, Mizorama district 11 zinga district pangaah Covid-19 positive an awm tawh rih lo a, chu'ngte chu Siaha, Champhai, Kolasib, Lawngtlai leh Hnahthial district-te a ni. Positive enkawl lai mi 10 leh a aia tam awmna district panga a awm a, positive tamna ber Aizawl district-ah mi 28 an awm a ni.

Kum 2011 chhiarpui aṭanga chhûtin, Covid-19 positive hmuh tawh zat 2,28,478 chu mi 1,000 zelah positive 208 an awm ang a ni a, mihring 1,00,000 zelah hripui vangin mi 63 an thi tawh ang a ni bawk.