CM-in MBOCWWB fund a hre vak lo ; Eptute zawhna a chháng thei lo

Labour, Employment & Industrial Training (LEIT) department changtu, Chief minister Lal Thanhawla chuan, Mizoram Building & Others Construction Welfare Board (MBOCWWB) fund a awm ve tih a lo hriat ve vak loh thu sawiin, eptu MLA-te zawh belhna chháng turin hriat a neih loh thu House a hrilh.

Eptu MLA pali - Vanlalzawma, Dr K Beichhua, Lalrinawma leh Lalruatkima ten 'MBOCWWB fund hman dan chungchang' an zawhna inṭâwm kal zela an zawh belhnate a chhannaah CM Lal Thanhawla chuan, "Ka neih loh zawng tak ni mah se, sum hi ka ngaihtuah ve lem lo. Hetiang fund hi a awm tih pawh ka lo hre ve vak lo. MBOCWWB fund hman dan hi mi rinawm tak chhuitir mek a ni a, chhui zawh hunah a hriat chian ang," a ti.

Lalruatkima chuan, MBOCWWB chung­changa dan (act) chu Assembly House-a siam leh zawhna pawh vawi tam tak a luh tawh avangin an zawhnate chu hriat âwm taka a ngaih thu a sawi. Eptu MLA-te hian district wise-a MBOCWWB sum sem a nih dan te, sum pek chhuah dan kalphung te, Assembly constituency wise-a sem a nih dan chhinchhiah a nih loh chhante an zawt a ni.

Chief Minister chuan, "Official-te'n kan minister-te an duh phawt chuan an thlim thei. Minister pawhin a hriat loh tam tak a awm. A changtu minister ber pawh an thlim theih chuan, kei lo chang lailâwk chuan hriat ka nei lo," a ti.

Eptu MLA-te zawhna, 'Serchhip, Champhai South, Ṭawi, South Tuipui leh Tuichang constituency chhunga MBOCWWB sum kum 2013-2014 chhunga hman a nih leh nih loh leh sum hman zat' zawhna chhangin Lal Thanhawla chuan, "Assembly constituency ang zawngin Welfare Board sum hman dan hi chhinchhiah a ni lo. Constituency ang zawngin dawngtu chhinchhiah a awm lo. Mi pakhatin a dawn zat pawh constituency ang zawngin chhinchhiah a awm lo a ni," a ti a; kum 2013-2014 chhunga MBOCWWB sum pek chhuah zawng zawng chu cheng vbc. 4.51 a nih thu a sawi.

Chief Minister tarlan danin, MBOCWWB hian din a nih tirh, kum 2011 aṭanga quarter tâwp December 31, 2016 thlengin cheng vbc. 46.41 hmu tawhin, cheng vbc. 23.83 an hmang tawh a, la hman loh vbc. 22.58 a la awm. Sum hi inhlawhfate tan cheng vbc. 5.61 hman a ni a, cheng vbc. 18.22 chu capacity building leh administration atan hman a ni.

Welfare Board sum hi mi 16,672 pek an ni tawh a, an vaiin MBOCWWB-a inziak lut vek an ni.

Eptu MLA-te chuan, MBOCWWB hnuaia inziak lutte chu an address engkim ziah vek a nih avangin LEIT department-in duh se chuan constituency wise-a an chhan theih tur thu te, hmun ṭhenkhatah member inziak lut sa ni lo ziah luh chawpa ṭanpuina pek an awm thute leh, MLA inthlan dawn hnaiah fund sem vakna constituency a awm thute an sawi a ni.