MPC-in T Sailo hmalakna Chhunzawm zel an tum

Nimin, March 27 kha MPC party dintu Brig. T Sailo thih champha a ni a; MPC chuan thuchhuah siamin, Brig. T Sailo chu an ui a, an thinlungah a thar thu an tarlang a, "Ram tana theihtawp chhuaha hma a lo lak tawhnate chhunzawma tihlawhtling turin theih­tawpa hmalak zel kan tum a ni," an ti.

Brig. T Sailo-in Zoram din chhuahna leh hma­sawnna hnukpui, Six Basic Needs a duan chhuah - chawa intodelh, kawng ṭha neih, tui hnianghnara neih, kawlphetha hnianghnâr a neih, inkalpawhna ṭha neih, thingtlang lam tih­hmasawn tihte chu T Sailo-in chief minister a nih chhungin chak takin a lo kalpui tawh tih an sawi a; a hnu kum 30 chhung party dangin ram an kaihhruai chhungin Brig. T Sailo hmachhawpte chhunzawm a nih loh avangin Mizoram chu retheihna khurah a táng ta reng niin an tarlang.

Mizoram sawp chhiata awm mek siamṭha a, tungding leh turin Brig. T Sailo-a policy leh prog­ramme hmangin ram tan hma an la zel dawn tih sawiin, MPC chuan, "Brig. T Sailo thih champha vawi hnihna a lo thlen hian amah hriatreng nan leh a policy-te tihlawhtling tura MPC party-te ke pên min ṭawiawm thar leh turin mipui kan sáwm a ni," an ti.