Zorama'n sakhaw hruaitute nuihza siam nana hmangah Congress MLA-te a puh

MNF president Zo­ram­thanga chuan, Cong­ress party MLA-te chu Assembly House-ah sakhaw hruaitute sawi bawrh­bângah leh nuihza siamna atana hmangah a puh a, "House-ah sakhaw hruaitute sawi bawrhbân leh nuihza siam nana hman kan remti ve dawn lo," a ti.

Zoramthanga hian nimina Mizo Hnam Rûna inkhawmah thu sawiin, "Mizo Kristiante'n House-ah mipui aiawha ṭhu tura an thlan lalte'n House-ah ngei kan kohhran hruaitute leh sakhaw hruaitute bâwl zãna sawi bawrhbân leh nuihza siam nana an hmang hi pawi kan ti tak zet a, Mosolman ramah chuan ni se, an thinrim a alh hluai ang. Hindu leh Buddhist ramah ni se, sakhaw mi leh mipui thinrim a sosang ngawt ang," a ti a; sakhaw puithiamte sawi bawrhbángtute zinga kohhran upa ngei an tel chu vanduaithlak an tih thu a sawi.

MNF President chuan, Congress sorkarin zu zawrh ṭhat leh ṭhat loh zir chiangtu tur committee an din chu rûkrûk ṭhat leh ṭhat loh zir chiangtu tur committee din nen a thuhmun reng niin a sawi a, "Zoram mipui hian Congress sorkar tih âwm tâwk lekah an ngai a ni," a ti.

Sorkar phalnaa zu zawrh a nih hnua record-a a lan danin, kum 2016 chhungin zu vangin police 340 chuang an thi nia sawiin Zoramthanga chuan, "Kumina thla thum vel nen chhût chuan an tam belh ngawt ang. Tunah hian police constable hna ruak 2,000 chuang a awm a, sum awm loh vanga hnawhkhah loh chu thuhran ni se, zuin a suat vanga post ruak pawh a tam hle ang," a ti a; zu vangin Mizo 3,000 - 4,000 vel thi tawh anga chhût a nih thu a sawi.

MNF President chuan, CM Lal Thanhawla'n 'Keini chu NLUP kan sem a, hlawhtlinpuiah kan inngai a, a dawngtute hlawh­tlin leh hlawhtlin lohah mawh kan phur lo,’ tiin a sawi nia sawiin, "Fa kan hring a, an lo piang a, a enkawl chhunzawm leh sei len chu kan mawh a ni tawh lo, tih ang vel a ni," a ti a; MNF chuan SEDP hmangin leilung hausakna hâi chhuakin Zoram thar an siam dawn niin a sawi bawk.