KHAWTHLIR

ODF-ah puang
Lunglei DC Lalzarmawii chuan, Tlabung leh Hnathial khuate chu inthiarna mumal nei lo awm lohna hmun, open defecation free (ODF)-ah a puang. ODF-a Tlabung leh Hnathial puan an nih thu hi state sorkarah thlen a ni ang a, sorkar aiawhte'n an la endik leh dawn a ni. Tlabungah hian V/C pahnih a awm a, Hnahthialah V/C pali a awm thung.

RKVY sum
Agriculture minister R Lalzirliana chuan MNF member Lalruatkima zawhna ziaka chhangin, kum 2012-2016 chhung­in RKVY hnuaiah cheng vbc. 415.94 hmuh a nih thu a tarlang a, "Heng sumte hi Agriculture & allied department pasarih leh autonomous district council pathumte hnenah sem ṭhin a ni," a ti.

NLUP dawng zat
AH&Vety Minister awm loh vanga a aiawha zawh­na chhangtu minister PC Lalthanliana chuan INC member John Siamkunga zawhna chhangin, AH&Vety department hnuaia NLUP hmanga eizawngtu mi 36,991 an awm thu House a hrilh.

NERCCDIP sawiho
Investment Program Empowered Committee chu nimin khan Secretariat conference hall-ah UDPA secretary Dr C Vanlalramsanga hoin Secretariat conference hall-ah an ṭhu­khawm a, North Eastern Region Capital Cities Development Project (NERCCDIP) an sawiho. NERCCDIP hnuaia Project-1 zawh tawh niin, Project 2 leh 3 kalpui mek a ni a, project pahnih chu 62.52% zawh tawh niin, Project-3 hnuaia contract 90% chu zawh a ni tawh.

ADC sum
Mizoram sorkar chuan Mizoram State Finance Commission report ang­in, autonomous district council (ADC) pathumte tan share in tax aṭangin cheng nuai 2897.74 leh non plan deficit grant aṭangin cheng nuai 18,692.79 a vaiin cheng nuai 21,590.53 a rua­hman. Sum ruahmante hi Lai ADC tan cheng nuai 8631.76, Mara ADC tan cheng nuai 8306.49 leh Chakma ADC tan cheng nuai 4652.28-te a ni.