India hmarchhaka Hindi dinhmun zirho
Surya Sanstahn Trust, Noida leh Mizoram University-a Department of Hindi ṭangkawp chuan nimin khan MZU Auditorium-ah ‘National seminar on National Values in Hindi Literature of North East India’ an buatsaih a; Governor Lt.Gen. Nirbhay Sharma-a'n a hawng.
Larsap chuan, India ramin zalenna a chan hnuah ram hruaitu hmasate chuan eng ṭawng nge national language-ah thlan tur tih an ngaihtuah tih sawiin, "Ram chhunga chengte zinga tam berte ṭawng hman Hindi thlan a ni. Hei hi chhim lam state-te leh ram chhung hmun dangte pawhin a tìrah an duh loh hle a, Hindi hi national language-ah ruat ni mah se, ram inpumkhatna a thlen nghal kher lo," a ti.
Hun kal zelah Hindi chu ram chhungah zau zawka kalpui leh zirtir a ni chho tih sawiin Governor chuan, "Hmarchhak bial pawh Hindi ṭawng hmang miah lo hnam tam tak chênna a ni a, sorkar laipui pawhin ram chhunga hnam hrang hrang inpawh leh inunau zual theih nan ṭawng inhriatpawh a ṭul tih hriain, Hindi zirtirna lam nasa takin a kalpui a ni," a ti a; hmarchhak bialah Hindi thiam an tam tawh thu a sawi.
Governor chuan English leh Chinese ṭawng dawtah Hindi hi hmangtu an tam ber thu sawiin, "Chuvangin Hindi ṭawng thiltihtheihna (strength) hre rengin kan ṭawng bakah Hindi leh ṭawng dangte kan thiam belh chuan nasa takin hma min sawn tir dawn a ni tih mipuiten i hria ang u," a ti.
Hindi ṭawng la hmelhriat miah lohte awlsam zawka an zir theih nan 'User - Friendly Hindi' uar a pawimawh tih sawiin, "Tunlai thiamna leh internet hmangin e-book leh e-library kaltlang pawhin a tam thei ang ber Hindi thuziakte a duh apiangin an chhiar ve theih nan kan chhawpchhuah a ngai," a ti a, Mizoramah Hindi ṭawng tih lar kan tum rualin Mizo hnamzia leh ṭawngte thehdarh a ṭul thu a sawi.
MZU vice chancellor Prof. H Lianzela chuan Mizorama Hindi ṭhan dan sawiin, "Kum 1950-ah Mizoramah Hindi zirtir hmasak ber a nih hnuah rambuai vangin Hindi zir châkna a tlahniam hle. Tun dinhmunah MBSE hnuaiah pawl 8 thleng Hindi zir a ni a, higher secondary school-ah chuan MICE leh Kendriya Vidyalaya-ah chauh Hindi zirtir niin, college level-ah Govt. Aizawl College-ah chiah Hindi subject a awm," a ti.
Seminar hawnnaah hian Surya Sansthan Trust secretary Devendra Kumar Mittal, Delhi Literary Board chairman Dr Ramsharan Gaur leh MZU-a Department of Hindi HoD Prof. Sushil Kumar Sharma-te pawhin thu an sawi a ni.