Naupang thihna tihtlem dan tur sawiho

Nimin khan IPR directorate auditorium-ah naupang thih dan thlirletna leh naupang thi a tlem theihna atana hmalak dan tur sawihona buatsaih a ni. He hunah hian, kum 2015-16 chhungin nau piang 1,000 zelah naupang kum khat hnuai lam thi 22 leh kum nga hnuai lam thi 24 a awm thu an tarlang.

Child Death Review (CDR) Sensitization and Training hi National Health Mission (NHM) hnuaia Reproductive and Child Health (RCH) leh UNICEF-te'n an buatsaih a ni a; naupang kum nga hnuai lam thihna chungchang an thlirho bakah, hmalak dan tur an sawiho a; vawiin leh naktukah chhunzawm a ni ang.

Report-a an tarlan danin, State HMIS record angin, Mizoramah kum 2015-16 chhungin naupiang 1,000 zelah naupang kum khat hnuai lam thi 22 (IMR 22) an awm a, kum nga hnuai lam thi 24 an awm bawk. Naupang thite thih chhan tam ber chu Pneumonia leh natna hrikin a thlen theih natna dangte a ni.

Nau thla kim loa piang leh a kaihhnawih natna dangte vanga thi an awm nual a; ei leh in thianghlim tâwk loh vang te, nuin nau a pai laia a inenkawl ṭhat tâwk loh vang te, naupang chênpuite'n zûk leh hmuam an tih ṭhin vang te, thing hmanga eirawngbawl vanga khû tam lutuk vang te, naupang damlo ngaihven hma tâwk loh vangtea nausen thi an awm theih thu an tarlang bawk.

Meeting hi Health principal director Dr K Ropari, Guwahati-a UNICEF Head Office aṭangin Dr Ravi Chandran, Dr Maulik Shah leh Dr Sonal Dayama ten an hmapui a; RCH-a state programme officer Dr Vanlalsawma'n CDR neih pawimawhna leh a tihdan tur tlangpui a sawi a ni.