Ṭhasiama Se No Neihna tlang Humhalh dan tur sawiho a ni
Tun hnaia Mizorama lìrnghîngin a sãwi vanga Ṭhasiama Se No Neihna tlanga lei khî humhalh dan tur leh khawchhak lama pípu sûlhnute lirnghing laka humhalh dan tur INTACH, Mizoram Chapter hruaitute chuan July 11, 2020 khan an sawiho.
INTACH Mizoram convener P Rohmingthanga chuan, Mizoram khawchhak lama lirnghingin Mizo hmun hlui hlu tak takte a chhiat mai loh nan humhalh a ṭul thu sawiin, lirnghingin a tihchhiatte sorkar leh zirna-in hrang hranga mithiamte'n an zir chian dante an ngaihchan thu a sawi a, "A bik takin Ṭhasiama Se No Neihna tlang vela lei min leh khî avangin he tlang hlu tak hi a him ta lo hlein kan hria a ni," a ti.
P Rohmingthanga sawi danin, lirnghingin Ṭhasiama Se No Neihna tlang a tihkhîk dan chu PWD engineer-te'n a hmunah an enfiah tawh a, Geology & Mineral Resources joint director Lalbiakkima leh GSI geologist Priscilla Rinmuanpuii leh mithiam dangte'n an enfiah tawh bakah, Champhai DC Maria CT Zuali'n a tlawh tawh bawk.
Sorkar lama mithiamte chuan hmalakna lian neih hmain lei hnuai chhungril (subsoil investigation) zir chian phawt a ngaiin an hria a; INTACH lam chuan lei khì chhungah ruahtui a luh tam loh nan tuihâwk danna siam a ṭulin an hria a, Champhai DC-in a khuhna tur silpauline a pek hmangin tlang bulṭhuta awm Chawngtui khua mite'n an khuh tawh a ni.
Vangchhia khuaa Ralven Pûk chung pawh lirnghingin a tichhe nual tih thu an dawng tih sawiin P Rohmingthanga chuan, "ASI (Archaealogical Survey of India) hotu Sujeet Nayan chu en chiang turin a thang mek a ni," a ti a; Mizo hmun hlui leh thil hlu tak takte humhalh a nih theih nan, a hmanhmawhthlak tawh avangin Mizoram sorkar chu hma la turin ngen an tum thu a sawi.
INTACH Convener chuan, Farkawna Lungkeiphawtial te, Lamsial Pûk leh Kungawrhi Pûk, Fiara Tui leh khawchhak tlangdung - Sailulâk, Fárkawn, Khankawn, Vaphai, Samthang, Khawbung, Dungtlang, Vangchhia leh Lianpui vela Mizo pípute lungphun pawimawh tak takte chu lirnghing vanga a chhiat loh nan hmalak thuai ṭul an tih thu a sawi bawk.